Ka dheng kali ha nongbah Shillong ka la long kawei na ki mat kaba la ïakren lut la ha ïew ha hat, shlem treikam ne wat ha ki dukan sha, ha ïing ha sem. Kat shaba leit ba wan, ka mat ïakren ïa ka dheng kali ka long beit hakhmat duh, kata haba ïakynduh shi bahaïing hasem, shi paralok ne kito kiba leit trei leit ktah bad leit donkam, shwa ban kylli ïa ka jinglong-jingman, ka kyntien kaba mih nyngkong ka dei ni la palat ka dheng kali. Kane ka mat ka la pynsohsat shi kat dei ïa ka leit ka wan ym tang jong uwei u ar hynrei ïa baroh kito kiba mih leit jingleit da ki kali bad wat ki arshaka ruh hateng-hateng ki sahkut lang. Kane ka dheng kali ym tang ba ka la pynsohsat tang ïa ki nongleit nongwan hynrei ka la pynktha khlieh shi kat dei ruh ïa ka Sorkar Jylla kumno ban wad ki lad ki lynti ban ïaleh ban weng ïa kane ka jingeh.
Khyndiat haba phai sha kata ka New Shillong sha Mawdiangdiang, ka la ailad ïa ka Sorkar ban pynhiar mynsiem khyndiat hynrei kane ruh imat kan ym lah ban weng satia ïa kane ka jingeh, namar haduh katno tylli kita ki tnat treikam ka Sorkar kin shah kynriah sha kata ka New Shillong, naba ki skul ki kolej kin dang ïai neh hajuh bad ki jaka sumar kin dang neh hajuh nalor kiwei kiwei. Ngi la ïohi ba na ka liang jong ka Sorkar Jylla lyngba u Symbud Myntri Rangbah ba khmih ïa ka tnat PWD Roads u la dep ban pynbna ba ka la don ka jingthmu ban tei noh ïa ki flyover na jingkieng Umshyrpi sha Mahavira Park bad kumjuh ruh najan jong ka shlem treikam Meghalaya Human Rights Commission (MHRC) ka ban leit lyngba ka jaka ba don mynshwa jong ka petrol pump ha Anjalee, ïa kaba la pynkynriah noh mynta. Hato ka Sorkar kan nud ban ïaid beit shakhmat ban tei ïa ki flyover? Kum ki nongshong shnong ki la angnud katta-katta ban ïohi noh ba kan long kawei na ki lad kumno ban weng ïa kane ka jingdheng kali bad ka jingkhapngiah jong ki surok kaba la ktah haduh katta-katta ïa ka leit ka wan kaba manla ka sngi.
Ngi la sakhi ba na ka liang jong ka Sorkar ka la lah ban pynkylla dur ïa ka Khyndailad na kaei kaba long ha ki phew snem kiba la leit sha kaba thymmai. Kumba la sakhi mynta la lah ban pynheh ïa ka surok ïaid kali da ka jingangnud ban lah pynduna ïa ka jingdheng kali, hynrei kane kam shym la wanrah jingmyntoi satia namar kumba ïohi mynta, wat la ka surok ka la kham heh, hynrei ka bynta kaba ki kali ki ïoh ban ïaid ka long hi kum ha ki phew snem kiba la leit namar la ïohi ba wat la ka la don ka jingpynheh surok, hynrei la ailad pat ban shah ïeng kali ha shi lynter ka surok. Hato don jingmut aïu ban pynheh surok haba ailad pat ban pynïeng kali harud surok? Kumta ka jingïakren ruh ka ïaid ba lada ka wan urlong shisha kata ka flyover, ïa kaba ngim pat tip pat lano kan urlong, la ha ki 5 snem, 10 snem ne 20 snem ban wan, kata ka jingdheng kali haduh katno kan lait.
Ka jingnang mih bun jong ki kali na kawei ka sngi sha kawei ka sngi, ka la nang pynkhapngiah ïa ka sor Shillong. Ka daw halor kane ka dei ba ki surok ki neh beit kumjuh nalor ba ki la dei lypa ki surok barit, ka jingpynïeng kali bad ki arshaka harud surok ka la nang pynrit shuh shuh, hynrei ka long pat kaba eh ban weng ïa kane ka jingeh, lada kum ki nongñiah kali kim ïatreilang ne pyrkhat lang ïa kiwei ym ban shu shim beit ba ka surok ka dei ka jong ki, ban shu pynïeng ha kat ki jaka kaba ki mon. Kane ka dei kawei na ki mat khamtam ha ki surok shnong, ha kaba kum ki nongpynïaid shnong kin hap ban shimkhia lang ban pynmih ki jingmana ba ym dei ban pynïeng kali harud surok khamtam ha ki bynta ba khapngiah, namar la ju sakhi ba ha ki surok shnong bym don ki pulit pynïaid kali, ki kali ki la shu ïeng katba mon bad khamtam lei kito kiba thied jingthied kim lah shuh ban ïaid kjat katto-katne hynrei ban ïeng beit sbak hakhmat dukan, naba la than eh ka jingjaituh bad kane ka rukom leh, ka pynwit bad pynsohsat pat ïa kiwei. Ynnai ïakren ïa ki kali kamai lei, namar ki ïeng ha katba lap bad wat ki nongshong kali ruh ki ïeng ap kali kat haba sngewbit khlem pyrkhat la kan pynwit ne em ïa kiwei. Kine kiei-kiei baroh ki dei kawei na ki bynta ba lada ngi lah ban ïapyrkhat bad ïatreilang, kan lah ban pyllait bun na ka jingeh jong ka jingkhapngiah.
