Shillong, Naiwieng 05
Ka Hynñiewtrep Youths’ Council (HYC) ka la ïoh ïa ka jingkular na ka Sorkar ban shim khia bad pynurlong ïa ki hynñiew tylli ki jingdawa kiba la buh na ka bynta ban ïakhun thma pyrshah ïa u drok.
Hadien ba ka HYC ka la thoh sha ka Sorkar ban dawa pyntreikam ïa ki mat jingdawa ban ïakhun pyrshah ïa ka jingjyllei u drok hapoh kane ka Jylla, na ka liang ka Sorkar lyngba u Myntri ka tnat Social Welfare, Bah Paul Lyngdoh ha ka Sngi Ba-ar ka la khot ïakren ïa ki nongïalam ka seng bad kular ban shim khia bad pynurlong ïa ki jingdawa.
U President ka HYC, Bah Roykupar Synrem u la ong ba katkum ka jingïakren, u Myntri u la pynpaw ba kiba bun na ki jingdawa ba ka seng ka la buh, ka Sorkar ka la pdiang ïa ki.
Ki hynñiew tylli ki mat ba ka HYC ka la phah sha u Myntri Rangbah ka Jylla ban ïakhun pyrshah ïa ka jingjyllei ki nongkhaïi bad nongdih drok ki kynthup ïa ka jingbuh ïa ki ïingbishar ba kyrpang, ban don ki muktiar Sorkar ba kyrpang bad ka kynhun pulit kaba kyrpang ban tohkit, ban don ïa ki pulit kyrpang ban ïakhun ïa u drok kumba la leh ha ka por ba ïakhun pyrshah ïa ki lehnoh.
U la ïathuh ba u Myntri u la pyntip hakhmat ka seng ba ïa kine ki jingdawa jong ka HYC ka Sorkar ka la pdiang, bad ïa ka jingïalang ba nyngkong jong ka Drug Reduction Elimination Action Mission (DREAM) yn sa pynlong ha ka sien kaba nyngkong ha ka 14 tarik mynta u bnai ka ban khlieh da u Symbud Myntri Rangbah ba khmih ïa ka Kam Pohïing (Police) bad yn don lang ruh u Mission Director.
Ha kaba ïadei bad ka jingbuh ïa ka ophis treikam jong ka Narcotic Control Bureau (NCB) ha Shillong, u Bah Synrem u la ïathuh ba na ka liang ka Sorkar Jylla ka la kular ba kan thoh sha ka Sorkar India ba kan buh ïa kawei ka ophis treikam jong ka NCB ha kane ka Jylla.
Ha kaba ïadei bad ka ki jaka sumar ïa kiba dih drok lane ki rehabilitation center, u la ong ba na ka liang u Myntri u la pyntip ba ki la don ki dorbar shnong kiba la leit ban pan jingkyrshan na ka Sorkar ban buh ïa ki jaka sumar.
U Nongïalam ka HYC u la ong ba ka seng ka la kren shai ba ka jingïakynduh kaba la long hynne ka sngi kam dei ban kut tang ha ka jingïakren, hynrei ka Sorkar kadei ban ai da ka jingthoh sha ka seng ïa kaei ba ka Sorkar ka la kular ba ka pdiang ïa ka jingdawa.
Ha kajuh ka por u Bah Synrem u la ong ba ka jingïalang ba ka seng ka la buh ban pynlong ha ka 7 tarik mynta u bnai ha Motphran kan ïaid beit, khnang ban pyni sha ka Sorkar ba kine ki jingdawa kim dei tang jong ka HYC, hynrei ki dei ki jingdawa jong ki paidbah.
“Ka jingïalang paidbah kan long beit bad lada ka seng ka ïoh ïa ka jingthoh jong ka jingkular ka Sorkar kan sa pyrkhat la kan pynsangeh noh ne tur beit sha Secretariat ha katei ka sngi”, u la ong.
