Shillong, Naiwieng 05
Uwei u samla uba dang 23 snem ka rta, u la shah dung tari haduh ba u la mynsaw jur bad mynta ban shah sumar hapoh ka jaka ai jingsumar.
Katkum ka khubor kaba la ïoh na ki pulit la ong ba ha ka 4 tarik mynta u bnai, ha ka por 1.15 shiteng synñia, ki pulit ki la ïoh jingtip ba uwei u briew ïa uba la tip kyrteng kum u Francis Nongspung (39 snem) la kynnoh ba u la dung da ka tari ïa u Banteiskhem Nongspung (23 snem) ha ka shnong Laitlum kaba hap ha East Khasi Hills District.
La ong ruh ba ha kane ka jingjia, une u samla u la mynsaw bad la pynkit noh mar-mar da ki bahaïing sha ka jaka ai jingsumar ha Supercare Hospital, ha kaba la bat noh ba un shah sumar.
Na ka liang ki pulit ki dang pynlong ka jingtohkit halor kane ban lap ïa ka daw tynrai halor ka jingdung tari jong une u rangbah ïa utei u samla.
