Shillong, Naiwieng 05
Ka committee kaba khlieh da u Justice BP Katakey ka la rai ban pynskhem noh ïa ki kyndon lane Standard Operating Procedure (SOP) kiba ïadei bad ka rukom wanrah ïa u dewïong nabar Jylla sha Meghalaya lane u dewïong uba hap ïaid lyngba ka Meghalaya ban shalan na kiwei pat ki Jylla shabar ri kum sha Bangladesh khnang ban khanglad ïa ka jinglehthok.
Kumba ka long mynta, ka Meghalaya kam pat dei ban don dewïong namarba dang don ka jingkhang ban tih, lait noh tang lada don u dewïong uba die lilam.
Ha ka jingïalang kaba la pynïaid da u Justice Katakey ha ka Secretariat ha ka Sngi Ba-ar, la pynskhem ïa ka SOP ha kaba ïa u Secretary ka tnat Mining and Geology dei ban kdew hapoh ka SOP ba donbynta lang haba shim rai.
Ka jingïalang ka la ïatai ruh halor ka jingai jingkheiñ bha thik-pa-thik halor ka jingwanrah dewïong nabar sha Meghalaya ban phah sha ki karkhana thang dewïong (coke plants) bad karkhana dewbilat ha kaba yn sa pynskhem noh ïa ka SOP hapoh shibnai.
Haba wanrah dewïong na shabar sha Meghalaya, ki kot ki sla ki dei ban biang ban pyni ïa ka tynrai jong ka jaka ba la wanrah ïa u dewïong bad donkam ruh ban pyni ïa ka syrnot kaba la ai na kata ka jylla kaba la wanrah ïa u dewïong.
Ïa ki kot ki sla ba wanrah ïa u dewïong hap ban pyni ha ki khyrdop (integrated check gate) ha Meghalaya bad lada jia ba lap ba don kano-kano na ki trok kaba khlem ïaid ha ki surok kiba la kdew ban ïaid ban leit pynhap ïa u dewïong, hap ban ñiew noh ïa uta u dewïong kum u dewïong uba la tih beaiñ ha Meghalaya.
Dei ruh ban pyntip lypa sha u Secretary ka tnat Mining and Geology 7 sngi ha shwa ban kit ïa u dewïong uba wan nabar jylla. Shuh shuh, lada jia ba ka trok kaba kit dewïong ka duh shiteng lynti, dei ban pyntip mar-mar sha kano-kano ka thanat pulit kaba kham jan khnang ban ïoh kylliang da kawei pat ka kali.
U Justice Katakey u la ïathuh ruh ba u la bthah ïa ka Sorkar Meghalaya ba kan pynshisha man ka por ban tip ïa ka tyllong kaba la wanrah ïa u dewïong sha ki karkhana thang dewïong (coke plant) bad karkhana dewbilat khnang namar donkam ban pytikna la u dewïong u dei shisha uba wanrah katkum ka aiñ nabar Meghalaya ne u dei u dewïong uba na Meghalaya uba la dep ban die lilam.
