Shillong, Naiwieng 05
Ka jingshah tuh jong ki tiar ki tar bad ki arshaka ha ki runar ka dang ïai bteng na kawei ka sngi sha kawei pat ha kylleng ki bynta jong ka nongbah Shillong bad wat shabar jong ka nongbah ruh kumjuh.
Katkum ka khubor kaba la ïoh na ki pulit la ong ba u Lumlang Stephant Lyngdoh u la ujor ba ha ka janmiet jong ka 2 tarik mynta u bnai, ki runar bym lah ban ithuh ki la ïoh ban rah tuh ïa kawei ka Laptop, kawei ka external hard drive bad ka pisa kaba long haduh T.70,000 na ka kali Mahindra Bolero ka jong u, kaba don ïa u registration number AS16-B-9011 kaba la pynïeng ha Lummawrie Laitumkhrah, Shillong.
Ha kawei pat ka jingjia shah tuh, u Macdonald Wahlang u la ujor sha ki pulit ba ha ka miet hapdeng 3 bad 4 tarik mynta u bnai, ki runar bym lah ban ithuh ki la tuh ïa ka arshaka jong u, kaba don ïa u registration number ML05-Z-5897 na ka jaka jong u kaba don ha Mawlai Umjaiur Block-III, Shillong.
Kumjuh ruh na ka liang jong u Zoremsdanga Ralte u la ujor sha ki pulit ba ha ka por mynsngi jong ka 3 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number AS01-EN-9734 na ka jaka sah ka jong u, kaba don ha Gora Line, Nongrimmaw Block-C, Laitumkhrah, Shillong.
Ha kaba ïadei bad kane, na ka liang jong ki pulit mynta ki dang pynlong ïa ka jingtohkit bad ban thwet ïa ki runar kiba donkti ha kane ka kam.
