Jowai, Naiwieng 05
Ka Seiñraij Jowai kum shibynta ka jingïarap kylliang kyrshan kylliang ha ka 5 tarik Naiwieng ka la leit ban ai jingïarap sha ka Chief Minister’s Relief Fund (CMRF) da kaba aiti ïa ka Cheque kaba 1 lak tyngka ha u Dy. CM ka jylla, u Bah Sñiawbhalang Dhar.
Ha kane ka jingleit ai jingïarap la lamkhmat da u Vice President u Bah EMH Passah bad General Secretary Bah Arwotki Sumer ha ka jingdonlang u Asst. Secretary Wyraiki Kharbuki nalor kiwei.
Lah ban kdew ba na ka liang u Myntri Rangbah ka jylla, u Conrad K Sangma u la kyrpad ïa ki paidbah ban synñiang jingïarap sha ka CMRF hadien ka jingjia shlei um ha Ri-lum Garo ha kaba la duh noh haduh 17 ngut ki mynsiem ba kordor.
U Bah Arwotki Sumer u la ong kane ka jingleit ai jingïarap sha ka CMRF ka dei shibynta ka jingïarap kylliang bad kyrshan kylliang ïa ki paralok Garo khamtam hadien ka jingkyrpad u Myntri Rangbah ban ai jingïarap ha ka jingjia shlei um.
