Shillong, Naiwieng 06
U Prof. Prabha Shankar Shukla, Vice Chancellor ka skulbah North-Eastern Hill University (NEHU), u la ong ba ki jingkynnoh pyrshah ïa u ba u dei uba isih ïa ki jaidbynriew trai ri-trai muluk ka long kaba bakla bad ka bym don nongrim hangno-hangno ruh.
Halor kine ki jingkynnoh kiba la mih pyrshah ïa u, na ka liang u Prof. Shukla ha ka 6 tarik u Naiwieng 2024, u la wan ban pynshai lyngba ki lad pathai khubor ha Shillong Press Club (SPC), ha kaba u la pyni da ka jingthoh ba napdeng ki 6 tylli ki kam kiba kham kongsan hapoh ka skulbah NEHU, 3 tylli ki dei kiba la ïoh ban bat da ki briew kiba dei ki trai ri-trai muluk kiba kynthup ïa ka kam Librarian, u karikor jong ka skulbah bad u nongpeit nongkhmih ne u ‘In-charge’ na ka bynta ban pynlong ïa ki jait eksamin khamtam hadien ba la pyntreikam ïa ka National Education Policy (NEP), 2020 bad kine baroh ki treikam pura hapoh ka skulbah khlem kano-kano ka jingthut bad jingujor. U Prof. Shukla u la pyntip napdeng kine 3 ngut ki trai ri kiba bat ïa ki kam kiba heh hapoh ka skulbah, 3 tylli ki kam la pynkhamti sha kiwei pat ki jaidbynriew kaba long katkum ka jingibit jong ki bor pynïaid ka skulbah. U la ong ruh ba na ka liang jong u, um kwah ban ong eiei ne kdew-kti hynrei kiei kiba la pynbeit hapoh ka skulbah ki dei kita kiba treikam kumba ka long mynta.
“Napdeng ki hynriew tylli ki kam, lai tylli ki kam ki dei kiba la thung da ki trai ri-trai muluk bad kaba sah phi lah ban pyrkhat la nga dei ne ngam dei uba isih ïa ki jaidbynriew trai ri-trai muluk, ngam ong eiei halor kata hynrei phi lah ban pyrkhat hi halor kata”, ong u VC.
