Shillong, Naiwieng 06
U MLA ka North Shillong Konstitwensi, Bah Adelbert Nongrum ha ka 6 tarik u Naiwieng 2024, u la leit ban jurip dalade ha Motphran kaba dei ka jaka kaba jur bha ka jdheng kali ha kaba ki kali kiba kamai na ka thaiñ Jaïaw ter-rer shaduh Mawlai bad Mawpat ki pyndonkam bad ïaid lyngba katei ka surok ban kit bad ban pynhiar ïa ki nongleit-jingleit bad ïa ki nongwan ïew nongwan hat.
Ha kane ka sngi leit jurip, u MLA u la pynlut por kumba 4 kynta ha Motphran ha ryngkat ka jingïadonlang ki bor pulit pynïaid kali bad ka kynhun ki nongñiah kali kamai ban peit ïa ka daw ba la pynlong ban mih ka jingdheng kali na ka por sha ka por ha katei ka bynta.
U Bah Adelbert u la ong ba ka daw ba kan sa mih kane ka jingdheng ha katei ka bynta ka dei na ka jingkwah jong ki paidbah nongshong kali ban leh ha la ka mon kata ban kiew ne ban hiar napoh kali ha ki jaka ba ki mon ban hiar ne kiew.
Namarkata, u la kyntu ruh ïa ki paidbah nongshong kali ba kim dei ban da ap haduh ban da poi ha ka jaka hiar ban ai ïa ka bai kali jong ki hynrei ki dei ban pynbiang lypa ïa ki bai kali khnang ba kan pynsuk bad ba kan nym long satia ka daw jong ka jingdheng kali.
U la ong ba ka ba ar pat, ka daw ka ban sa pynlong ïa ka jingdheng kali ha katei ka bynta, ka dei na ki nongñiah kali kamai ki bym ïeng ha ki jaka pynïeng kali bad kiba ju kylli pat ïa ki paidbah ïa ka jaka ba ki leit bad ong ba kum kine ki nongñiah kali kamai ki dei ban kit beit ïa ki paidbah namar kane ka jingleh jong ki ban da kylli shwa ka la pynsahkut ïa ki kali kiba wan nadien.
“Ngi dei ban don ka jingsngewthuh haba ngi ñiah ïa ki kali khamtam haba ngi poi ha ki bynta ba don ki lad khnang ba ka kali kaba wan napdeng kan leit suk bad kan ïaid suk”, ong u Bah Adelbert.
Utei u nongmihkhmat u la kyntu ruh ïa ki nongkamai kali kiba khlem ïeng ha ki jaka pynïeng kali ba ki dei ban buh la u jong u nongpeit ne ‘Volunteer’ u ban peit ïa ka jingdheng kali ha kato ka jaka bad lada kim leh kumta na ka liang ki Dorbar Shnong jong katei ka jaka ha ryngkat u MLA, kin sa leh da kaba tyngeh.
Shuh shuh u la kyntu ïa ka tnat pulit khamtam ïa u pulit ba dei khmih ka thanat Lumdiengjri ba un leh ïa la ka jong ka kamram kumba la bynshet kata ban buh kumba 4 ngut ki pulit pynïaid kali ha katei ka jaka naduh ka por mynstep haduh ka por mynmiet. La sakhi ruh ba ki don ki ‘riew paidbah kiba la hap ban pynïaid hi dalade ïa ki kali ha katei ka jaka bad kane ka lah ruh ban tehlakam ïa ka dheng kali ha katei ka jaka ha ryngkat ka jingïatreilang jong baroh kaba kynthup naduh ka tnat pulit, ki ‘riew paidbah, ki nongñiah kali kamai bad ki briew jong ka shnong khnang ba yn ban weng ïa kane ka jingeh kaba khraw bha.
