Mawkyrwat, Naiwieng 06
Ki dkhot jong ka Khasi Students’ Union ( KSU) Langkynma Area Unit hapoh ka jingïalam u samla Ioanis Hahshah kum President, ha ka step ka 6 tarik u Naiwieng 2024 ki la ïoh ban bat kumba 12 ngut ki suba nong Bangladesh na ka thaiñ Nongjri-Nonghyllam ki shnong khappud kiba hap hapoh Ranikor Civil Sub-Division, South West Khasi Hills District.
Katkum ka jingtohkit ki dkhot jong ka seng hadien ba ki la ïoh bat ïa ki ha ka por kumba 7:00 baje eiei mynstep, kitei ki suba nong Bangladesh kiba kynthup ïa ki kynthei, khynnah bad ki rangbah ki la ïathuh ba ki dei na ka shnong Sunamganj District jong ka Bangladesh. Ki la ïathuh ruh ba jingwan kiew jong ki sha India ka dei namar ba ka don ka jingïakajia ha Ri Bangladesh bad kam don ka shongsuk shongsaiñ ha katei ka Ri.
Ha kaba ïadei bad katei ka jingjia, ka KSU South West Khasi Hills District khlem da pynslem ha kajuh hi ka sngi ka la leit ban ïakynduh ïa u Deputy Commissioner ka district, u Bah Barnari Mawlong ha kaba ka la pynpaw ïa ka jingsngewkhia kaba khraw halor ka jingïoh laitlan ki briew na Bangladesh ban wan rung tuh ha shilynter ka khappud India bad Bangladesh ha South West Khasi Hills District da ka jingthmu ban wan buhai shnong.
U samla Forwardman Nongrem haba kren sha ki lad pathai khubor u la ong ba kane, kam dei shuh kaba dang thymmai hynrei ka seng na ka por sha ka por ka la ju ujor ha ki bor distrik halor ka jingïoh rung tuh ki nong Bangladesh sha Ri India.
Ka seng ka pynrem jur ruh ïa ki shipai BSF ki bym shimkhia ban peit pyrman ïa ka jingrung tuh jong ki briew ba nabar man ka por. U la ong ruh ba kaba kham sngewsih eh ka long ba ki BSF ha ka jaka ba kin pyrkhing ïa ka jingrung tuh jong ki bar ri, hynrei ki buh ktem talasi pynban ha ki shnong Khasi ban pynwit pynban ïa ka ïaid ka ïeng u paidbah kum ha 18 Mer bad ha Lad Balat kaba la jngai da ki phew kilometer na khappud.
Ka KSU ka la kynthoh jur ruh ba ka jingïohlad jong kine ki briew na Bangladesh ban wan kiew katba mon sha India ka dei lyngba ka jingdon jong ki dalal napoh India, kiba la ïalam lynti ïa ki bad ïa kata lah ban sngewthuh namar ba ha ka jingtohkitki ka KSU, kine ki nong Bangla ki ïathuh shai ba kim tip shuh ïa ka lynti ban leit phai pat.
Namarkata, ka KSU ka la dawa na ki bor pynïaid District ba ki dei ban kem mardor ïa kitei ki dalal, kiba long ka lynti ïa ki nong Bangla ban wan rung sha India.
