Shillong, Naiwieng 06
U Nongïalam ka Bharatiya Janata Party (BJP) uba dei u MLA na Pynthorumkhrah, u Bah Alexander Laloo Hek u la ong ba ka BJP ka sngap ïa ka jingud jingnam jong ki paidbah ka Jylla, bad ha ki snem ki ban wan kan sa ïoh bun ngut ki MLA ha Meghalaya.
Haba kylli, u la ong ba ka daw ban kiew ka BJP ka long namar ki kam pynroi ba ka la leh ha kylleng ka ri India, bad khamtam eh ba ka la rai ban nym pyntreikam ïa ka Uniform Civil Code (UCC) ha ki jaka ba don ki riewlum.
“Ka BJP ka sngap bha mynta ïa ka jingeh ba ki paidbah ki ïakynduh, ka sngap ïa ki jingeh jong ki riewlum dei na kata ka daw ka la pyllait ïa ka jingpyntreikam ïa ka UCC ha ki jaka jong ki riewlum, kynthup ha Meghalaya”, la ong u Bah Hek.
Haba kylli shuh shuh, u la ong ba na ka liang ka Sorkar Jylla ruh ka la kyntu ïa ka Sorkar Pdeng ba ïalam da ka BJP ban ym pyntreikam ïa ka UCC ha kane ka Jylla. Kane ka rai ban ym pyntreikam ïa ka UCC ka pyni ba ka BJP ka kloi ban ïatreilang bad ka Sorkar Jylla.
“Namar kane ka jingkloi ban ïatreilang jong ka Sorkar India bad ka Sorkar Jylla, ki paidbah suki-suki kin sa sngewthuh ba ka BJP ruh ka kloi ban trei katkum ka jingkwah ki paidbah bad ha kata ka por kin sa jied ïa ki nongmihkhmat kiba dei na ka seng BJP”, la ong u Nongïalam ka BJP
Lah ban kdew ba u Myntri ka Kam Pohïing ka ri India, u Amit Shah ha ka 3 tarik Naiwieng u la pynbna paidbah ha Jharkhand ban pyllait ïa ki jaka jong ki paid riewlum na ka jingpyntreikam ïa ka UCC.
