Nongstoiñ, Naiwieng 06
Ka Lyngngam Presbyterian College Mawthengkut, ha ka 6 tarik u Naiwieng 2024 ka la ïoh ban rakhe ïa 3rd Graduation Day da kaba pynkup burom ïa 57 ngut ki samla pule ha kaba u MLA ka thaiñ u Bah Methodius Dkhar u la long u kongsan ha ka jingdonlang u Bah MA Chalam, SDO Civil kum u symbud kongsan.
Ha katei ka jingrakhe kaba la pynlong ha phyllaw jong ka kolej ha Nongkyna, na ka liang ka kolej ka la ïoh ruh ban ai burom da ki memento sha baroh ki samla pule ba la pyndep ïa ka jingpule jong ki na ka bynta batch 2020-2021.
U Bah Methodius Dkhar haba kren kum u kongsan ha kane ka sngi u la ong ba ka jingjop ha ka jingim kam shym la mut tang ïa ki briew kiba heh spah hynrei ki lah ban long ki nonghikai, ki nongrep bad kiwei kiwei hynrei kaba kongsan ka dei ka jingtrei shitom. Shuh shuh u Bah Methodius u la ong ruh ïa ki samla kiba la pyndep jingpule ba ka jingïoh jong phi ïa kane degree ka long kumba phi ïoh ïa ka pansngiat kaba phin sa phong shi junom.
U Bah Methodius u la ong, ki samla pule ki dei ban sngewnguh ïa kiba la noh synñiang ha ka jingim jong ki naduh ba dang kha haduh kane ka khyllipmat kat haduh ba kin da ïoh phong ïa ka pansngiat jong ka graduation.
Shuh shuh u la ong ruh ba ha man la u briew u don beit ïa ka jingbha bad ka jingsniew hynrei dei ban shim ïa ka nuksa babha khnang ban nang lah ban kiew ha ka jingim. Ha kajuh ka por u la ong ruh ba ki samla pule ki dei ban pyndonkam hok ïa ka degree khnang ba kin long kiba jop.
Ha katei ka sngi, nalor ki kongsan la donlang ruh u Pastor A Nongbri, President Governing body jong ka kolej, Pastor Dr. BK Shangpliang, Secretary Governing Body, Pastor J Nongdkhar, Pastor RS Diengdoh, Pastor Dr. PR Marthong, ki tymmenbasan, ki nongïalam na ki Balang, nonghikai, ki kmie kpa bad kiwei kiwei kiba la shah khot sngewbha.
