Shillong, Naiwieng 06
U Nongïalam ka UDP uba dei u MLA na Khliehriat, Bah Kyrmen Shylla u la ong ka seng ka la pynkhreh na ka bynta ka ilekshon MDC ka ban sa long, bad u la ïathuh ba ka seng ka la aiti laitluid ha ki nongïalam hapoh ki district ban jied ïa ki kyrtong.
Ha kaba ïadei bad ka ilekshon na ka bynta ka Jaiñtia Hills Autonomous District Council (JHADC), u la ïathuh ba don sa tang katto-katne tylli ki konstitwensi ba ka seng kam pat ïoh kyrtong.
Ha kawei ka liang u Bah Kyrmen Shylla u la kyntait pat ban ïathuh ïa ka kyrteng jong ki kyrtong ba ka seng ka thmu ban pynïeng thymmai. Pynban u la ong ba baroh 6 ngut ki MDC ba ka UDP ka don mynta ha JHADC kin ïoh tiket ban ïakhun biang ïa ka ilekshon.
Kumba ka long mynta ha JHADC, ki MDC ka UDP ki don 6 ngut, NPP 19 ngut, BJP 1 bad ki MDC ba khlem seng ki don 4 ngut.
Haba kylli ïa ki nongrim ba ka UDP kan leit ha ka ilekshon MDC khamtam hadien ka jingmih ka seng bathymmai ka Voice of the People Party (VPP), u Bah Kyrmen u la ong ba ka seng kan leit sha ki paidbah ban kyrpad na ka bynta ka jingkyrshan halor ka nongrim ba ki nongmihkhmat ki la trei.
“Ki paidbah ha kane ka kynti kim dei ban shu sngap ne ngeit tang ïa ka ktien hynrei ba kin peit ruh ïa ki kam ba la leh da ki nongmihkhmat ha shwa ban ai ïa ka vote”, u la ong. Ha kawei ka liang u Nongïalam ka UDP uba dei ruh u Myntri ha ka Sorkar, u la ong ba ka long ka jingkyrkhu ban don ha ka Sorkar namar ka plie lad shibun na ka bynta ban pynïoh ïa ki kam pynroi sha ki paidbah.
U la ong ba lada ym don ha ka Sorkar ym ïoh shibun ki skhim ban ym lah ban ai ka jingshakri kaba bha ïa ki paidbah. Pynban da kaba don ha ka Liang Synshar lah ban pynïoh shibun ki kam pynroi.
“Ki paidbah ki khmih lynti ba ki nongmihkhmat (MLA/MDC) ba ki la jied kin don ha ka Liang Synshar ban ïoh bun ki jingmyntoi, ym ban shong ha Liang Pyrshah”, la ong u Bah Kyrmen.
