Shillong, Naiwieng 06
Ka jingïakhih shong kyllaiñ mungor bad jingshah thngan ba khlem buh por ba la pynlong da ka NEHU – Students’ Union (NEHUSU) bad ka Khasi Students’ Union – NEHU Unit (KSU-NU) ha ka Sngi Ba-ar kan ïai bteng tat haduh ba u Vice-Chancellor (VC) ka NEHU, u Prof. Prabha Shankar Shukla un pynurlong ïa ki jingdawa jong ki.
“Kito ki mat jingdawa lyngba ki dorkhas, u VC um shym la pynsngew kiei kiba un leh, pynban u la pynleit jingmut haba ïadei bad ka thung kam thung jam,” ong u President ka NEHUSU, samla Sandy Sohtun haba kren sha ki lad pathai khubor halor ka jingpynshai u VC ha ka Sngi Balang.
Haba kdew ba lehse ka lah ban don kaei-kaei sha lyndet, utei u samla u la ong ba haba ïadei bad ka jingthung ïa u Pro-VC, u VC u la batai shai ba u la dep thoh shithi teng mynshuwa ban un sa thoh shithi biang bad lada ka tnad pule-puthi ka Sorkar Pdeng kam ai kano-kano ka jingmynjur hapoh u Nohprah (2024), kata un (VC) sa thung hi na ka liang jong u.
“Ka mut aïu kata…ynda ngi la shong kyllaiñ mungor bad shah thngan, un sa poi kata ka pud ban ong ba hap thung ïa kita ki Pro-VC…ha kine ki 3 snem ba la leit, ym shym la thung ïa kita ki Pro-VC. Mynta balei u sngew kyndeh bad don ka jingkitkhlieh…lehse dei na ka jingmih madan jong ngi ne don kiei-kiei sha lyndet ba um kwah buh ïa ki Pro-VC ha kine ki snem ba la leit,” ong u samla Sohtun.
Haba pynsngew ba u VC u la kren halor ka jingdon jong ka komiti haba ïadei bad ka jingthung kam, u la ong ba ka seng ka la buh jingkylli ïa u VC ba mano ba dei Chairman jong ka komiti bad u la pynshai ba dei ma u.
“Ki briew kiba don ha kane ka komiti ruh dei kiba jied lut ma u hi…u buh beit da ki briew jong u ha kaba…lada wan kino-kino kiba mut ban thung – kiba jied ma u, da kita hi un sa phah kubur…lehse ïoh don kum kata sha lyndet, ngim lah ban ong,” ong u President da kaba bynrap ba wat ka NEHUTA bad NEHUNSA ruh bun kim tip mano ba don ha kata ka komiti lane mano kita ki ‘riewshemphang.
Halor ka jingthung kam ïa u Deputy Registrar, u samla Sohtun u la ong ba ka seng ka tip shai ba ha ka 23 tarik Ïaïong, 2023, la pyllait ïa ka jingpynbna bad ha kato ka por, u long u bym bit bym biang bad u bym shemphang ha ka kam – u wan ha ka kyrdan kaba 146, bad ka seng ka don ruh ïa ki jinglum thup haba ïadei bad kane.
“Ha ka 22 tarik Kyllalyngkot, 2024, la pyllait biang ïa ka jingpynbna (ba la ïap noh ka barim) bad une u Amit Gupta u la wan banyngkong eh. Kumno ngin ym buh jingkylli na ka liang jong ngi. Lada u long uba bit ba biang ruh hooid, hynrei tang ban thoh shithi bha ruh um lah. Kumno na ka liang jong ngi, ngin ai lad kum ïa une ba un synshar ha kane ka skulbah,” u la ong. Haba phai pat sha u Registrar, utei u nongïalam ka NEHUSU u la ong ba baroh ki tip ba u la dei teng u shipai, bad ha ka por ba u long COA ruh, la mih kiba bun ki jingbakla haba ïadei bad ka jingpynïaid ïa ka CUET naba um don ïa kata ka ‘Academic Experience’.
Haba kynthoh ba u VC u ju pyni bor beit ïa ki kynhun samla pule khamtam ïa ka NEHUSU, u samla Sohtun u la ong, “Mynta ka kynti, na ka liang jong ngi ha ryngkat ka jingïatreilang bad ka KSU-NEHU Unit, ngi la pynlong ïa kane ka jingshong kyllaiñ mungor bad jingshah thngan bad ngin ym sangeh tat haduh ba kin da sngap ïa kine ki jingdawa jong ngi.” Shuh shuh u la ïathuh ba ka seng ka la dep thoh shithi sha Delhi haba ïadei bad ka jingduna bad jingtlot jong u Prof. Shukla ban pynïaid ïa ka skulbah – bad phah ruh sha ki Myntri Sorkar Pdeng bapher-bapher, kumjuh sha ka President bad u Myntri Rangbahduh ka ri.
“Lada um sngap, kan sa poi ka por ba baroh ki samla pule kin ym shong klas shuh bad ngin hap ban khang noh ïa kane ka skulbah tat haduh ba un da sngap beit ïa ka jingdawa jong ngi ki samla pule,” u la ong. Kine ar seng ha ka taïew ba la dep ki la ai por haduh ka shiteng synñia jong ka 4 tarik u Naiwieng ïa u VC ban weng kam noh shi syndon ïa u Registrar, Deputy Registrar lem bad kiwei pat kiba la shah kynnoh thung kam be-aiñ ha ka skulbah.
