New York, Naiwieng 06 (UNI)
U kyrtong Republican – Donald Trump u la jop ïa ka ilekshon President ka Amerika bad u long uba la khreh ban wanphai biang sha ka ‘White House’ hadien ba u la jop don burom bad tam ïa ka jingdonkam ‘vote’ kaba 270.
Une u President ba 47 jong ka Amerika haba kren sha ki paidbah ha Florida: “Ka Amerika ka la ai sha ngi ïa ka rai kaba khlaiñ ka bym pat ju jia khoit mynno-mynno.”
Na ki 7 tylli ki Jylla (kongsan) ba ïakhaid ka jingïakhun, u Trump u la jop ha North Carolina, Georgia, Pennsylvania bad Wisconsin bad u la wan hakhmat ha Michigan, Nevada bad Arizona. Ka kyrtong Democrat – Kamala Harris kam pat pdiang ïa ka jingshah rem ne kren sha ki nongkyrshan jong ka wat la ki paidbah ba sngewsih ki la mih noh na ka ‘Watch Party’ ha shuwa ban pynbna ïa kylla kut jong ka risol.
Ki Republican ki la shim biang noh ïa ka Senate na ki Democrat hadien katto-katne ki jingpynbeit.
Haba kren sha ki nongkyrshan ka ri ha ka step Sngi Balang, u Trump u la kular ba un ïalam ïa ka “Golden Age of America” hadien ka jingpyllait ïa ka “Greatest Political Movement of all time.”
“Kane ka long, nga ngeit, ka jingïakhih saiñ pyrthei kaba khraw tam ha baroh ki por. Ym pat ju jia koit kaba kum kane hapoh kane ka ri, bad lehse shabar. Bad mynta kan sa kynjoh ïa ka kyrdan thymmai jong ka jingdonkam namar ngi hap ban ïarap pynkoit ïa ka ri,” ong u Trump ha shuwa ka 2:30 baje ha ka step Sngi Balang haba kren sha ki nongkyrshan jong u ha ka jingïalap ‘Watch Party’ jong u ha West Palm Beach, Florida.
“Ngin ïarap ïa ka ri jong ngi hangne. Ngi don ïa ka ri kaba donkam jingïarap, bad ka donkam kyrkieh ïa ka jingïarap. Ngin pynbeit ïa ki khappud jong ngi. Ngin pynbeit lut baroh haba ïadei bad ka ri jong ngi bad ngi la shna ïa ka khana ka ban sah pateng na bynta ka daw, mynta ka miet. Bad ka daw kan long beit tang kata. Ngi la jop ïa ki mawjynthut kiba baroh ki pyrkhat ki bym lah long,” u la bynrap katba u paidbah ki la pyrta, “USA, USA, USA!”
U Trump u la kiew rynsan hadien ba ka ‘Fox News’ ka la ïathuh ba un sa jop ïa ka Jylla Pennsylvania, kumjuh ïa ka Wisconsin, Georgia bad North Carolina. U la ïoh palat 270 ki ‘electoral vote’ ha ka por kumba 1:45 baje mynstep, da kaba pynrem noh ïa ka Harris.
“Man la ka sngi, ngan ïakhun na bynta jong phi. Bad ha ryngkat man ka jingring mynsiem ha ka met jong nga, ngan ym shongthait tat ynda ngi la pynïoh ïa ka Amerika kaba khlaiñ, kaba shngaiñ bad kaba riewspah kaba ki khun ki kti jong ngi ki dei hok ban ïoh. Kane shisha kan long ka juk ksiar jong ka Amerika. Dei kane kaba ngi hap ban don. Kane ka dei ka jingjop ba khraw na bynta ki nong Amerika ka ban ai lad ïa ngi ban pynlong ïa ka Amerika kaba khraw biang sa shisien,” u la ong. Na bynta u Trump, ka jingjop ïa ka Wisconsin ka la ñiat ïa une u Republican ban jop palat 270 ‘electoral vote’ kaba donkam ban jop ïa ka ilekshon.
Katto-katne na ki mat ïalap ilekshon u Trump ki kynthup ïa kito ba ïadei bad ka ïoh ka kot – ha kaba u la kular ban “pynkut ïa ka jingkiewdor bad ban pynlong biang ïa ka Amerika kaba bit ba biang ha ka liang ka dor ka mur” – bad ka jingwan buhai shnong ha kaba u la ong ba un pyndep ïa ka jingshna jong ka kynroh khappud US-Mexico ïa kaba u la kular ha ka kylla ba la dep.
