Shillong, Naiwieng 06
U Working President ka National People’s Party (NPP) Bah Hamlet Dohling uba don mynta ha Gambegre Konstitwensi, u la don bha ka jingkyrmen ba ka Mehtab Chandee A Sangma kaba dei ka kyrtong NPP na Gambegre ha kane ka ilekshon MLA shiteng samoi kan ïoh rah ïa ka jingjop namar ka la trei shitom bha ban pynshai sha ki paidbah.
Ka Mehtab ka dei ka kurim jong u Myntri Rangbah ka Jylla u Conrad K Sangma kaba la mih shakhmat ban long kum ka kyrtong NPP na Gambegre konstitwensi hadien ba u Saleng A Sangma u la iehnoh ïa ka kam kum u MLA hadien ba u la shah jied kum u MP Lok Sabha ka Tura.
U Bah Hamlet u la pynpaw ka jingkyrmen namar baroh ki MLA, ki MDC, ki nongtrei NPP ki la ïatreilang ban rung sha man la ki shnong ban pynshai ïa ka nongrim jong ka seng.
U la ïathuh ba nalor ki MLA bad MDC kiba dei na rilum Garo, ki MLA bad ki nongkitkam na rilum Khasi naduh u Symbud Myntri Rangbah ka jylla Bah Sniawbhalang Dhar, Dr. WR Kharlukhi MP ka Rajya Sabha, Bah Wailad Shylla MLA, Bah HM Shangpliang, Bah Jason Sawkmie kiba dei ki MLA barim bad kiwei de ki la hiar sha Gambegre konstitwensi.
“Ka rukom ïalap ilekshon ha Gambegre na bynta ka kyrtong NPP ka la long pher bha namar ngi pynlong jingïalang paidbah, ngi rung ïing ban pynshai ba ka kam pynroi ka dei ban ïaid hapoh ka jylla bad ka dei ban poi sha man ki konstitwensi,” u la ong.
Shuh shuh u la pynpaw ba ki paidbah ka Jylla kin kham shai namar ba ka BJP bad NPP kim shym la don jingïadei namar ha kane ka ilekshon ka BJP, TMC ki la pynïeng kyrtong la ka jong ban ïakhun pyrshah ïa ka kyrtong NPP.
