Shillong, Naiwieng 06
Kumba 385 tylli ki krem tih dewïong yn sa jied ha ki saw tylli ki district kiba ju pynmih ïa u dewïong na ka bynta ban pynbha pat ïa kito ki jaka kiba la shahktah namar ka jingtih dewïong ha ki snem kiba la leit noh ha kaba kumba 200 tylli ki krem dewïong ki dei kiba don ha East Jaiñtia Hills district.
Ka jingithuh bad jied lypa ïa kine ki krem dewïong na ka bynta ban pynbha pat ïa ka mariang ka dei katkum ka hukum jong ka National Green Tribunal (NGT) kaba la pynmih ha u snem 2019 ha kaba la bthah ïa ka Sorkar Meghalaya ban lum ïa ka pisa kum ka ‘cess’ haba shalan ïa u dewïong uba la lum thup ban lilam katkum ka aiñ bad ruh ka pisa kaba ïoh lum haba shalan ïa u dewiong uba shu ïoh kurup bad ïa ka pisa dei ban pynlang hapoh ka Meghalaya Environment Protection and Restoration Fund (MEPRF).
Ïa ka thup kyrteng jong kine krem dewïong dei ban pynpoi noh sha ka tnat Mining and Geology hapoh jong une u bnai Naiwieng.
Ka Sorkar kam pat lah ban pynïaid ïa ki kam hadien ba shah ktah ha u COVID 19 bad ki kam ki la sdang ban ïaid ha u snem 2023 ha kaba ka Sorkar Meghalaya ka la thung ïa ka Central Mine Planning and Design Institute Limited (CMPDIL) kaba dei lang ka shnat jong ka Coal India Limited na ka bynta ban pynkhreh ïa ki DPR bad ïa ki kam yn sa pyntrei da ki shnat treikam bapher bapher hapoh ka jingpeit jong ka tnat Mining and Geology.
Ki kam kiba dei ban pyntrei ïa ki projek ban pynbha biang ïa ki jaka ba shah ktah namar ka jingtih dewïong ki kynthup naduh ka jingtap noh ïa ki krem ba tih dewïong, ka jingpynkhuid biang ïa ka um kaba la kylla bih kaba tuid na krem dewïong, ka jingthung ïa ki dieng bad kiwei kiwei ki jingthung bad ka jingpynpoi umbam umdih sha kito ki shnong kiba shah ktah ki bym ïoh ïa ka um kaba khuid. Ïa ki projek yn bei lyngba ka pisa kaba la don hapoh ka MEPRF.
Na ka liang ka tnat Mining and Geology ka la phah ban ithuh bad jied kumba 200 tylli ki krem dewïong kiba don ha East Jaiñtia Hills district, 75 tylli ki krem dewïong ha West Khasi Hills district, 50 tylli ha South West Khasi Hills district bad 60 tylli ha South Garo Hills district.
Ha kajuh ka por, ki don 2 tylli ki projek kiba dang shu pyrshang ban pyntrei (pilot project) ha kaba ïadei bad ka jingpynbha pat ïa ki krem dewïong kiba kynthup kawei ka krem dewïong ha East Jaiñtia Hills district bad kawei pat ka krem dewïong ha South Garo Hills district. Ki survey bapher bapher ne ki jingpeit bniah ïa kine ki krem dewïong bad ki jaka hajan jong ka krem ki la ïaid shakhmat bad ynda la dep ka jingpeit bniah baroh, kan sdang sa ka jingpynkhreh ïa ki DPR da ka Central Mine Planning and Design Institute Limited (CMPDIL).
Lada kine ki 2 tylli ki projek ki long kiba jop ha ka jingpyntrei, yn sdang ïa ki kam sa ha kiwei ki krem dewïong kiba la dep ban jied lypa.
La ong ba ka jurip kan dep ha une u Naiwieng bad ka jingpynbit pynbiang ïa ki DPR jong baroh ar tylli ki projek lah ban dep ha shwa ban kut une u snem 2024. Baroh ki DPR dei ban ïaid lyngba ka ‘oversight committee’ kaba la thaw da ka NGT na ka bynta kane ka jingthmu.
Ka jingbei pisa na ka bynta ki projek ban pynbha pat ïa ki krem dewïong bad ki jaka ba shah ktah kan wan lyngba ka Meghalaya Environment Protection and Restoration Fund (MEPRF).
Ka pisa kaba dei ban rung sha ka MEPRF dei ban peit da ka Jylla hapoh ka jingkhmih u Chief Secretary ka Jylla. Haduh mynta, kumb T.300 klur ka pisa ka la don lypa hapoh ka MEPRF.
