Jowai, Naiwieng 06
Ki nongwad bniah bad nongthoh histori na kylleng ka thaiñ shatei Lammihngi kumjuh shabar jong ka ri India, ki la wan sha sor Jowai ban ïashim bynta ha ka jingïalang kaba tip kum ka 43rd Session of the North-East India History Association (NEIHA).
Kane ka jingïalang ka ban neh lai sngi lynter naduh ka 5 tarik haduh 7 tarik Naiwieng, la pynïaid da ka Thomas Jones Synod College, Jowai lyngba ka jingkyrshan ka Chief Minister’s Special Grant.
Ha kane ka jingïalang la wan shim bynta palat 200 ngut ki delegates na kylleng ka thaiñ shatei lam-mihngi.
Ïa ka jingïalang la plie da u kongsan Dr. WR Kharlukhi MP Rajya Sabha ha ka jingdonlang u Chief Executive Member jong ka JHADC Ma Thombor Shiwat, u President barim ka NEIHA Prof. JL Dawar kumjuh ka President bathymmai ka Prof. Salam Irene, ka Principal Thomas Jones Synod College, Jowai Dr I Dkhar, u JB Bhattacharjee, retired prof NEHU, ki riew pawkhmat ka sor Jowai, ki nonghikai nalor kiwei kiwei.
U Dr. WR. Kharlukhi MP Rajya Sabha ha ka jingkren u la pynkynmaw ïa ka histori jong u Khla Wait ka Ri Khat-Ar Dolloi u Woh Kiang Nangbah uba ka sorkar phareng ka la shim ïa ka jingim jong u da kaba sdien phasi ha Iawmusiang ha ka 30 tarik Nohprah 1862.
U Dr. Kharlukhi ha ka jingïalang u la pyntip ba u wan bujli ha ka jaka jong u Myntri Rangbah ka Jylla bad u la pyntip ruh ba na ka liang u CM u pynpaw ka jingsngewsih ba um lait ban donlang ha kane ka jingïalang namar ka ilekshon shiteng samoi ha Gambegre hynrei u la phah pat ka kitbor-kitrwiang sha ka Thomas Jones College bad ka NEIHA. Ka General Secretary NEIHA ka Kong Amena N Passah, ka la ong ba ïa NEIHA la sdang ha u snem 1979 halor ka jingthmu ban pynshlur bad kyntiew ïa ka jingwad bniah ïa ka history jong ka thaiñ shatei lam-mihngi bad ki jaka ba marjan kiba ïadei histori bad ka.
Ka la ong ruh ba ka NEIHA ka ju pynlong ïa ka jingïalang man la u snem ha ki skulbah bad kolej bapher-bapher jong ka thaiñ shatei lammihngi bad ka pynmih ruh ïa ki kot jingthoh kiba ïadei bad ki jingeh ba ka thaiñ ka ïakynduh, ka roi ka par, ka ïoh ka kot nalor kiwei ki kot kiba don jingmut haka imlang sahlang.
Nalorkata ka Kong Amena N Passah, ka la pyntip ruh ba ki dkhot jong NEIHA kimdei tang kiba mihkhmat ïa kawei pa kawei ka jaka pule jong ka thaiñ shatei lammihngi hynrei wat na shabar jong ka thaiñ kynthup ruh shabar ri.
Ka President bathymmai ka Prof. Salam Irene ka la kren halor ka phang “The Impact of Colonialism on the Religion, faith and Culture of the tribals of Manipur” ne Ka jingktah jong ka jingsynshar phareng ïa ka niam, ka jingngeit bad ka kolshor jong ki riewlum jong ka jylla Manipur.
Ha kane ka jingïalang la pyllait paidbah ruh ïa ki ar tylli ki kot ba la aikyrteng ‘Betel Culture Amidst the Valley in Northeast India” ba la thoh da ka Dr. Iadeishisha Ladia bad ‘A Concise History of The Freedom Movement of India and Assam-With special reference to Martyr Kushal Konwar’ ba la thoh da u Sristidhar Dutta.
Shwa kane la pyllait paidbah ruh ïa ka ‘Scarve’ jong ki nong Jaiñtia kaba dei kawei pat ka dak ban ithuh ïa ka kolshor ha ka riam ka beit ryngkat ka dustur.
Ïa ka jingïalang la pynïaid da u Vice Principal JJSC Bah Wandy EH. Lamin bad ka Kong Annarica Thma Local Secretary NEIHA 43rd Session ka la ai ki kyntien khublei.
