Shillong, Naiwieng 06
Namar ka jingbym sngewhun ïa ka rukom treikam u Vice-Chance-llor (VC) ka North-Eastern Hill University (NEHU), u Prof. Prabha Shankar Shukla bad ha kajuh ka por ka jingmih shibun ki kynrum-kynram naduh ba u la shimti ïa ka kam kum u VC bathymmai, ki samla pule jong kane ka skulbah ki la dawa ba utei u Professor u dei ban hiar shuki mardor. Pynban na ka liang u Prof. Shukla u la ong ba un ym hiar shuki satia na ka kam VC namar ïa ka jingthung kam ïa u hapoh ka skulbah la leh da ka President ka Ri.
Kum ban shu kdew hangne, na ka liang ki samla pule ka skulbah ki la pynlong ruh da ka jingshong shah thngan kaba khlem por hakhmat ka ophis treikam jong u VC naduh ka 6 tarik u Naiwieng 2024, kum shibynta ban pyrshah ïa ka jingthung kam jong u ïa u Registrar bad Deputy Registrar nalor ka jingkynnoh ba u isih ïa ki trai ri, ka jingbym thung kam ïa u Pro-VC ha Shillong bad Tura NEHU Campus nalor ki kiwei-kiwei.
Haba kren sha ki lad pathai khubor ha Shillong Press Club ha ka Sngi Balang, u Shukla u la ong ba un ym hiar shuki satia kum u VC namar ïa ki rai baroh hapoh ka Skulbah la leh da ka President ka Ri ym da ma u shimet. Ym tang katta, hynrei ïa ki jingeh ruh baroh u lah ban pynsngew sha u Secretary ka tnat pule-puthi ka Sorkar Pdeng ym ban pynsngew beit-beit sha ka President ka Ri.
“Ka jingthung kam ïa nga la leh da ka President ka Ri bad ïa ki jingshim rai baroh la leh hi da ka President bad katkum ki rukom treikam, ngam donbor ban pynsngew beit-beit sha ka shlem treikam jong ka President ka Ri hynrei nga lah ban pynsngew ïa kine baroh sha u Secretary ka tnat pule-puthi ka Sorkar Pdeng”, ong u Prof. Shukla.
U Prof. Shukla u la kren shai ruh ba na ka liang jong u, un sa khot ïa ka seng jong ki khynnah pule ka skulbah kata ka NEHUSU, ka kynhun jong ki nonghikai ïa kaba la tip kum ka NEHUTA bad ka kynhun jong ki nongtrei ki bym dei ki nonghikai kata ka NEHUNSA, sha ka miej jong ka jingïakren bad ong ba um don jingtip halor ka jingdon bynta jong ki nonghikai ban kyrshan ïa ki khynnah pule kiba la pynlong ïa kane ka jingïakhih.
U Prof. Shukla u la buh ruh ka jingkyrpad hakhmat kine ki seng bapher-bapher kiba don hapoh ka skulbah NEHU ba kin weng noh shisyndon ïa ka jingïakhih na ka bynta ka bha- ka miat jong ki khynnah pule ka skulbah.
U la bynrap da kaba ong ruh ba kaei ka ban jia lada kane ka jingïakhih kan neh da ki sngi, ki taïew ne ki bnai bad ong ba ha kaba kut, kane kan ktah hi ïa ka jingïaleh eksamin jong ki khynnah pule bad ong ba kin dei ki khynnah pule hi ki ban mad ïa ki jingeh.
Na ka liang u Shukla u la kyntu ïa baroh kiba ïadonbynta bad kiba la pynlong ïa ka jingïakhih ba kin wan shakhmat ban ïakren na ka bynta ban wad ïa ki jubab kiba yn mynjur lang katkum ki kyndon bad ki jingpynïaid jong ka skulbah.
“Ka jingkyrpad jong nga sha kine ki kynhun ka long ba kin sangeh noh na ka jingïakhih jong ki namar kane ka jingïakhih kan ktah ïa ki eksamin bapher-bapher jong ki samla pule”, la bynrap u Prof. Shukla.
Shuh-shuh u Prof. Shukla u la ong ruh ba na ka liang jong u, u long uba la kloi bad um don jingthut hangno-hangno ruh ha kaba ïadei bad ka jingshah pynkynriah kam jong u la ka long shano-shano ruh.
