Shillong, Naiwieng 06
U Vice Chancellor ka North-Eastern Hill Uni-versity (NEHU), u Prof. Prabha Shankar Shukla u la ong ba ka jingdawa ban weng kam noh ïa u Registrar, Deputy Regis-trar (Academics), Officer on Special Duty (Direc-tor, College Development Council), bad ïa u nongpynïaid ïa ka Guest House ha NEHU, kam shong ha ka rai jong u shimet bad ïa ka jingpynkynriah kam ym lah satia ban pyntreikam da kaba pynshong nongrim ha ka rai ba shiliang ne ka jingsngew shimet.
Haba kren sha ki lad pathai khubor ha ka Sngi Balang ha Shillong Press Club, u Prof. Prabha Shankar Shukla, u la ong ba ïa ka jingthung kam ïa u Registrar bad Deputy Registrar la thung hadien ka jingpeit kaba bniah bad ka jingïakren kaba pura bha.
Ïa ki bynta bad ka jingbteng jong ki ha ka jingshakri la pynïaid da ki rukom treikam kiba dei, ym da ki rai kiba shu shim kylliang na kano-kano ka bor synshar, ba kynthup ruh ïa u Vice-Chancellor.
U la ong ba kumba ka la paw ha ki lad pathai khubor, ki kynhun kiba kynthup naduh ka NEHUTA, NEHUNSA bad NEHUSU ki la dep ban rah ïa ki jingeh jong ki sha ka Sorkar, kynthup sha ka President ka Ri India bad ong ba lada ka Sorkar ka suba ba don kino-kino ki jingleh bym hok, ka lah ban pyrkhat ban thaw da ka komiti tohkit ban bishar bniah ïa kane ka kam. Pynban kat haduh mynta kam shym la don kano-kano ka jingpyntip na ka Sorkar Pdeng lane na ka shlem treikam jong ka President ka Ri sha ka shlem treikam jong u Vice-Chancellor kaba pyni ïa kum kane ka jingleh bad ong ba ka long kaba donkam ban tip ba ka jingpynkut noh ïa ka kam jong u nongtrei sorkar kam lah ban jia khlem ki daw kiba biang bad kiba thikna.
“Ka long kaba donkam ban tip ba ka jingpynkut noh ïa ka kam jong u nongtrei Sorkar kam lah ban jia khlem ki daw kiba biang bad kiba thikna. Lada don shisha ki jingsngewkhia ne ki daw na ka bynta kano-kano ka jingleh kaba kum kata, ka jingtreikam kan sdang da ka jingtohkit, ym da ka jingpynkut noh mardor”, ong u VC.
Ha kaba ïadei bad ki kam jong u OSD (Director, College Development Council), u Prof. Shukla u la ong ba u la leit sha kiba bun ki Professor ban pyrkhat ban shimti ïa katei ka kam, hynrei ym don ba ai jingmynjur bad ong ba u long uba la kloi ban thung ïa kino-kino ki Professor kiba kloi ban trei kum u Director jong ka College Development Council bad kum ki nongpynïaid ïa ki ‘Guest House’ da kaba bynrap ba ka NEHU mynta ka ïakynduh ïa ka jingduna ha ka liang ki nongtrei ki bym dei ki nonghikai.
“La dep pynmih ïa ki jingpynbna na ka bynta ki kam bym dei ki nonghikai, bad wat la ka National Testing Agency (NTA) ka la kyntait ban pynlong ïa ki eksamin thung kam bym dei ki nonghikai, hynrei ngi la ïaid shakhmat da kaba khot tender ïa kiwei pat ki ‘agency’. Ki bun ki tnat ki la pyni ïa ka jingsngewtynnad, bad ynda la plie biang ïa ka shlem treikam jong u Registrar ha kaba mynta la khang namar ki jingïakhih, kine ki kam kin ïaid shakhmat”, ong u Prof. Shukla.
Ha kaba ïadei bad ka jingdawa ban thung ïa u Pro-Vice Chancellor ha Shillong bad Tura Campus, u Prof. Shukla u la ong ba na ka liang ka skulbah ka la thoh da ka shithi sha ka Sorkar Pdeng ban ïoh jingshai shuh shuh halor kane ka kam bad ong ba lada kam don kano-kano ka jubab halor kane hapoh u bnai Nohprah 2024, na ka liang u VC un sa thung ar ngut ki Pro-Vice-Chancellor na ka bynta ka Shillong bad Tura Campus ki ban dei ki trai ri-trai muluk.
