Shillong, Naiwieng 07
U MDC ka NPP na Mawlai, Bah Teiborlang Pathaw u la pynpaw ka jingartatien ban ïakhun biang ïa ka ilekshon ka ban sa long ha ki khyndiat bnai ban wan.
U la ong ba u la ïakhun ïa ka ilekshon MLA la lai sien, hynrei u khlem poi sha ka thong, bad hadien ba u la jop ïa ka ilekshon MDC ha u snem 2019, u la pyrshang ban pynpaw ïa ki jingangnud ban trei, hynrei u la ong ba ki jingangnud jong u kim rung satia ha ki nongshong shnong ka Mawlai bad kim ibit ïa u ban long uta u nongmihkhmat.
“Ha kane ka kynti nga hap pyrkhat arsien, nga lah ban poi sha ka bynta ba ngan nym ïaleh shuh ïa ka ilekshon, namar hadien ba ki paidbah ki la pynkup bor ïa nga kum u MDC nga la trei, hynrei nga ïohi ba kane ka jingtreikam kam rung ha ki jingmut jingpyrkhat ki paidbah”, u la ong.
Haba kylli, u Bah Teibor u la ong ba um tieng ïa kata ka seng saiñpyrthei thymmai ban ïakhun ilekshon, namar ha ka ilekshon ka dei ka mon u paidbah.
“Ha ka jingïaleh ilekshon ngam tieng ïa ka seng thymmai ne kaba rim, ka jingïaleh ilekshon jong nga ka dei na ka bynta ban wanrah jingmyntoi ïa ka shnong Mawlai”, la ong u MDC.
Haba kylli shuh shuh, u Bah Teibor u la ong ba ïa kaba hadien um pat nang ban batai, la un dang ïakhun biang ne em ïa ka ilekshon, tangba ïa kaba mynta u artatien.
