Jowai, Naiwieng 07
Ki don haduh 4417 ngut ki bar jylla kiba trei kiba ktah kum ki nongbylla ha ki khyndai (09) tylli ki karkhana pynmih dewbilat kiba don ha East Jaiñtia Hills District.
Kane ka jingkheiñ jong ka jingdon ki nongtrei bar jylla ka la mih pyrthei ha ka jubab ba la ai da u Chief Executive Member jong ka JHADC u Bah Thombor Shiwat haba jubab ïa ka jingkylli ba la wanrah da u MDC ka Jowai North u Bah Brightstar Chyrmang ha ka Dorbar Tlang jong ka JHADC ha ka 7 tarik Naiwieng.
U CEM u la ïathuh ba ki don haduh 4417 ngut ki nongtrei bar jylla na baroh ki karkhana pynmih dewbilat ha East Jaiñtia Hills District kiba la shim ïa ka ‘non tribal employees service licenses’ na ka JHADC naduh ka 1 tarik u bnai Ïaïong 2023 haduh 30 tarik bnai Nailur 2024.
Haba jubab pat ïa ka jingkylli ba la wanrah da u MDC ka Jowai Central u Bah Andrew Shullai, u CEM u la ïathuh ba ka Council ka la ai NOC tang ïa ka Meghatop Cement Company, Wahïajer, Narpuh, East Jaiñtia Hills District naduh ka 1 tarik u bnai Risaw 2023 haduh 30 tarik u bnai Nailur 2024.
Katba u Executive Member jong ka JHADC u Bah Eveningstar Teron u la ïathuh ba ka Council ka la ïoh 54,24,606 tyngka kum ka khajna na ki ïew ki hat hapoh ka Council naduh ka 1 tarik Ïaïong 2023 haduh 30 tarik u bnai Nailur snem 2024.
