Jowai, Naiwieng 07
U Chief Executive Member (CEM) jong ka Jaiñtia Hills Autono-mous District Council (JHADC), Bah Thombor Shiwat u la kynthoh jur ïa katto-katne ngut ki nong Jaiñtia kiba ïeng ban ïada ïa ki bar jylla kiba khaïi-pateng ha Rilum Jaiñtia haba khynra laisen khaïi da kaba kam trai ïa ki dukan jong ki bar jylla khnang ban lait shim trading license (laisen khaïi) ki bar jylla.
U Bah Thombor u la pynpaw ïa kitei ki jingkynthoh haba jubab ïa ka motion ba la wanrah da u MDC jong ka Jowai Central u Bah Andrew Shullai ha ka Dorbar Tlang jong ka JHADC ha ka Sngi Palei.
U CEM u la ïathuh ba ki don ruh ki Waheh Shnong bad ki Seng ha Rilum Jaiñtia kiba khang ïa ki bar jylla ban wan shim ïa ki laisen khaïi na ka JHADC da kaba kular ïa ki bar jylla ba kin bah ma ki lada wan khynra trading laisen ka JHADC.
U CEM u la ïathuh ba ka Executive Committee ka la thaw ïa ka Revenue Augmentation Committee khnang ban thaw ïa ki lad ki lynti ban pynmih pisa ïa ka Council. U la kynthoh ruh ba haduh mynta tang shisien ruh um pat ïoh satia kano-kano ka kaiphod na ka Mobilisation Committee bala thaw da ka JHADC namar kim shym la shong jingïalang satia wat tang shisien ruh.
Katba na ka liang jong u Deputy Chief Executive Member jong ka JHADC u Bah Lasky Rymbai u la ïathuh ba ka Council ka la pynkiew ïa ka bai NOC jong ki karkhana shna coke na ka 50 hajar tyngka sha ka 2 lak tyngka bad ka bai renewal sha ka shi lak tyngka.
U la ïathuh shuh shuh ba ka Council ka la pynkiew ïa ka bai NOC ïa ki karkhana pynmih dewbilat na ka 5 lak tyngka sha ka 10 lak tyngka bad 5 lak tyngka bai pynthymmai.
Ha kawei pat ka liang, ka Dorbar ka la pynpaw ïa ka jingsngewlem halor ka jingkhlad noh jong u Chief Executive Member barim jong ka JHADC bad u Myntri barim ka Sorkar Jylla u Bah HB Dan bad u MDC barim ka Rymbai u Bah Welcome Dkhar haba ki dkhot baroh ki la pynlong ïa ka jingsngap jar kaba shi minit bad la ïoh ïa ki kyntien sngewlem na u CEM bad kiwei de ki MDC.
