Jowai, Naiwieng 07
U Chief Executive Member (CEM) jong ka Jaiñtia Hills Autono-mous District Council (JHADC), Bah Thombor Shiwat u la ïathuh ba ka Council ka dang dei ban ïoh haduh 113 klur tyngka na ka Sorkar Jylla kum ka bhah khajna jong ki mar poh khyndew ba rem dor bad jem dor ne ki major mineral bad minor mineral.
U Bah Thombor u la ïathuh ïa kane haba jubab ïa ka jingkylli ba la wanrah da u MDC jong ka Jowai North u Bah Brightstar Chyrmang ha Dorbar Tlang jong ka JHADC ha ka 7 tarik Naiwieng.
U CEM u la ïathuh ba ka Council ka la ïoh 86.63 klur tyngka kum ka bhah khajna jong u marpoh khyndew heh (major mineral) bad 29.94 klur tyngka kum ka bhah khajna jong u marpoh khyndew rit (minor minerals) na ka Sorkar Jylla naduh ka 1 tarik u bnai Ïaïong 2023 haduh 30 tarik bnai Nailur 2024. Na katei ka pisa ba la ïoh na ka Sorkar Jylla, ka Council ka la ïoh ban siew tulop ïa ki MDC bad nongtrei haduh u bnai Nohprah 2023.
U Bah Thombor u la ïathuh ba ka Council ka dei ban ïoh haduh 32.89 klur tyngka kum ka khajna jong ka major minerals jong u snem 2023-2024 bad 57.68 klur tyngka jong u snem 2024-2025 bad shuh shuh 9.87 klur tyngka kum ka bhah khajna jong ka minor mineral jong u snem 2023-2024 bad 11.74 klur tyngka jong u snem 2024-2025.
Haba jubab pat ïa ka jingkylli bala wanrah da u MDC ka Raliang u Bah Robinus Syngkon halor ka jingïoh bhah na ka jingregister ïa ki kali da ka tnat Transport, u CEM u la ïathuh ba ka Council ka la ïoh haduh 8.87 klur tyngka kum ka khajna naduh u snem 20230-2024.
U Bah Robinus ula pynpaw ïa ka jingsngewkhia jong u halor ka jingïoh duna palat ka bhah khajna na ka tnat Transport bad u la buh jingkylli katno tylli ki kali la register ha Rilum Jaintia.
U CEM u la jubab ba ka Sorkar Jylla kam ju ai kano kano ka kaiphod halor katno tylli ki kali la register ha ka shi snem haduh mynta haba pyllait ïa ka bhah khajna sha ka JHADC.
