Jowai, Naiwieng 07
U MDC jong ka Jowai North Konstitwensi, Bah Brightstar Chyrmang u la kyntu ïa ki MDC baroh ban mih surok ban talasi ïa ki baroh ki trok kiba ïaid ha surok bah khnang ban tehlakam ïa ka jingshalan tuh ïa u dewïong na Rilum Jaiñtia kaba la ktah shi kat dei eh ïa ka pla tyngka jong ka Sorkar Jylla bad ka Jaiñtia Hills Autonomous District Council (JHADC).
U Bah Brightstar u la pynsngew ïa kitei ki kyntien haba ai ïa ka jingkyrshan ïa ka motion ba la wanrah da u MDC jong ka Jowai Central u Bah Andrew Shullai ha ka Dorbar Tlang jong ka JHADC ha ka Sngi Palei mynta ka taïew.
U MDC ka Jowai North u la ong ba u dewïong u dei marpoh khyndew uba hakhmat eh ba ai shibun bah ka khajna sha ka Sorkar Jylla bad ka JHADC hynrei ka long kaei-kaei kaba sngewkhia ban ïohi ïa ka jingtih bad ka jingshalan dewïong beaiñ na ka Rilum Jaiñtia.
Haba wanrah ïa ka motion, u Bah Shullai u la kynthoh jur ïa ka Executive Committee jong ka JHADC ka bym la shim kino-kino ki lad ki lynti kiba thymmai ban pynmih pisa ne khajna ïa ka Council bad kumba long mynta ka Executive Committee ka shu ap khmih lynti ban ïoh pisa na ka Sorkar Jylla.
U la ong ba ka JHADC ka dei ka tnat shimet kaba don bor ban thaw ki lad ki lynti ban pynmih pisa ïalade. Hynrei kumba long mynta ka Executive Committee kam shym la shim kino-kino ki lad ki lynti kiba thymmai kumno ban pynmih pisa bad ka JHADC mynta ka kylla long kum ka tnat kaba rit jong ka Sorkar Jylla.
Haba kyrshan ïa ka motion ba la wanrah da u Bah Shullai, u MDC ka Shangpung, Bah J Treilang Suchiang u la kynthoh ba ki karkhana pynmih dewbilat kim ai satia kano-kano ka jingïohnong ïa ka JHADC kumba dei ban long.
