Shillong, Naiwieng 07
Ki samla pule ka skulbah North Eastern Hill University (NEHU) kiba dang bteng ïa ka jingïakhih hapoh ka jingïalam ka NEHU Students Union, ha ka Sngi Palei ki la bitar lep ïa ki dkhot ka Voice of the People Party (VPP) kiba la leit ban tuklar ha katei ka jingïakhih ba la pynlong ha phyllaw jong ka skulbah.
Ki dkhot ka VPP hapoh ka jingïalam u Bah Danny Langstieh uba dei u Finance Secretary ka seng ki la leit ïakynduh ïa u Vice Chancellor, Prof. Prabha Shankar Shukla, bad hadien ba la dep ban ïakynduh ki dkhot ka VPP ryngkat u VC ki la mih lang shabar ban kren ïa ki samla pule.
Haba ïohi ïa kane na ka liang u President ka NEHUSU, u Samla Sandy Sohtun u la mih shakhmat ban ong ba ki samla pule kim kwah ïano-ïano ruh ban tuklar ïa ka jingïakhih ki samla pule, kaba la pynlong ïa ki dkhot ka VPP ban rung biang shapoh kamra treikam u VC.
“Ngi kwah ba u Vice Chancellor un hiar shuki bad ngim kwah ba mano-mano ruh kin wan tuklar, ngim sngap shuh mat dei sa mano-mano ruh”, la ong u Nongïalam ka NEHUSU.
U Samla Sandy u la ong ïa ki dkhot ka VPP ba kin sngewbha ban leit la kajong ka lynti, lem kumta kin khang syndon ïa ka khyrdop katei ka skulbah.
