Shillong, Naiwieng 07
U Bah Paul Lyngdoh, Myntri ka tnat Social Welfare jong ka Sorkar Jylla, u la phah da ka shithi sha u President ka Hynñiewtrep Youths’ Council (HYC) Bah Roykupar Synrem shwa ba ki dkhot ka seng kiba la byrngem kin mih na Motphran ban leit tur sha Secretariat.
Haba u President ka HYC Bah Roykupar u la ïeng ban kren u la pule ïa ka shithi ba la phah da u Bah Paul Lyngdoh kaba la pyntip ba ka Sorkar kan sa shong ïa ka State Level Meeting kaba nyngkong kaba dei halor ka DREAM projek ha ka 14 tarik mynta u bnai Naiwieng ha kaba u Symbud Myntri Rangbah ka Jylla uba bat ïa ka tnat Kam Pohïing, u Mission Director Bah Francis Kharshiing ban shim rai ba ïa ka ANTF kaba dei ka kynhun pulit ban buh la ka jong bad ban buh noh la ka jong ka ïingkashari kaba kyrpang ban tehlakam ïa ka jingsniew u drok.
“Kumba ngi la ong ba lada ka shithi ba wan na ka sorkar ka thiang ngin nym leit tur shuh sha Secretariat hynrei lada ka shithi ka jew ngin tur beit, hynrei katkum ka shithi ka pyni ba ka sorkar ka la sngap ïa ka jingdawa jong ngi,” u la ong.
U la ong bunsien ka Sorkar ka shu kular hynrei ka slem bha ban pyntreikam, kumta ka seng ka la rai ban ai por hapoh laiphew sngi naduh mynta ka sngi ba la ïoh pdiang ïa ka shithi ba kan pyntreikam noh ïa ki hynñiew tylli ki mat ba ka seng ka la dawa.
U la pyntip ba hadien ka laiphew sngi lada ka Sorkar kam pyntreikam kumba ka la kular, na ka liang jong ka seng kam donkam shuh ban khot jingïalang paidbah hynrei kan tur beit sha Secretariat.
Katba u Bah Donboklang Kharlyngdoh uba dei u Vice-President ka HYC Sengkmie u la ong kumba ki pulit ki la siat ïa u briew uba la wan sha ka jingïasuk, kam don jingeh ïa ki pulit ba kin siat beit ïa kito ki briew kiba pynjot ïa ka imlang ka sahlang lyngba u drok.
Ha kane ka sngi la ïoh jingkren na u General Secretary ka HYC Bah Rhembor Saibon, Bah Samborlang Lyngdoh President ka JNC bad kiwei kiwei, bad ïa ka jingïalang la pynïaid da u Bah Donboklang Kharlyngdoh.
