Shillong, Naiwieng 07
Ki samla pule jong ka North-Eastern Hill Uni-versity (NEHU) kiba don hapoh ka shatri jong ka North-Eastern Hill Uni-versity Student Union (NEHUSU) ha ryngkat ka jingïadonlang jong ka KSU NEHU Unit, ha ka nohphai sngi jong ka 7 tarik u Naiwieng 2024, ki la thang ïa ki dur tyngshop jong u Vice- Chancellor, Prof. Prabha Shankar Shukla, u Registrar bad u Deputy Registrar hakhmat ka ophis treikam u Vice-Chancellor ha NEHU.
Ha shwa ba ki samla pule ka skulbah kin thang ïa kitei ki 3 tylli ki tyngshop dur, na ka liang u Prof. Shukla u la mih shabar ka shlem treikam ban ïakren bad ki nongïalam ka NEHUSU bad KSU NEHU Unit ha kaba u la pan por 10 sngi ban thung ïa ki Pro Vice-Chancellor ha Shillong bad Tura NEHU Campus. Pynban na ka liang kitei ki samla ki la jubab kylla ba u la don hapoh ka skulbah kum u VC la 3 snem bad buh jingkylli balei um leh ïa kata naduh kito ki snem ba la leit.
Shuh shuh na ka liang kitei ki samla ki la pan jingpynshai ruh halor ka jingdonkti jong u ban thung kam beaiñ ïa u Registrar, Deputy Registrar bad kiwei ki ophisar hapoh ka skulbah bad ban dawa weng kam mardor ïa ki, hynrei na ka liang u Prof. Shukla pat u khlem lah satia ban ai jubab eiei halor kane ka bynta, kaba la pynlong syndon ïa ki samla ba kin leit ban thang noh ïa ki dur tyngshop kum ka dak ka jingpynrem ïa u VC halor ka jingbym lah jong u ban pynurlong bad sngap ïa ki jingdawa jong ki.
Na ka liang ki samla pule ha shwa ka jingshim rai ban pynlong da ka jingshong ïakhih, ki la leit ban aiti da ka dorkhas ha u VC ban pynpaw ïa ki jingdawa jong ki. Hynrei ha katei ka jingïakren bad u VC, ka la mih ka thma ktien kaba jur katta-katta hapdeng u VC bad ki samla pule halor kane ka jingdawa.
Nalor kata, ki samla pule ki la khot bad pynpaw hakhmat u Prof. Shukla ba u dei ban iehnoh ïa ka kam Vice Chancellor, da kaba ong ba kim don jingshaniah shuh ha ka jinglong nongïalam jong u.
Hadien ka jingthang ïa utei u tyngshop, ki samla kiba shong ïakhih ki la rai ba kin dang ïai bteng ïa ka jingshong shah thngan tat haduh ba u VC un da hiar shuki bad weng kam ïa u Registrar, Deputy Registrar bad kiwei ki ophisar.
