Nongpoh, Naiwieng 07
Ki nongïalam shnong jong ka thaiñ Shakoikuna ha Ri Bhoi District hapoh ka lama jong ka Joint Action Committee Umdap Area ba la wan ban synran lang naduh ki longkmie, ki longkpa bad ki samla, ha ka Sngi Palei da ka jingsngewkhia ki la mih shakhmat ban leit kynduh ïa u Bah M Pyrbot, Executive Engineer ka tnat PWD (Roads) Nongpoh Division ban ïakren halor ka jingsniew shaba palat pud jong ka surok Pahammawlein 20 Mer sha Shakoikuna kaba buh ïa ki paidbah ka thaiñ ha ka jingeh bad jingjynjar.
Kane ka jngleit ïakynduh ïa u Karikor ka PWD ka dei hadien ba katei ka surok kaba la dep ban mang tyngka bad kaba la ïoh ban pyntrei da u Bah Sunshine Sawkmie lyngba ka skhim Pradhan Mantri Gram Sadak Yojana (PMGSY) ha ka jingjngai kaba 5.12 kilometer, la shu ieh khongreng khlem pyndep satia mynta la shiphew bnai lynter.
Ka daw kaba la pynbitar ïa ki paidbah haduh ba ki hap ban mih paidbah ka dei hadien ba utei u kontraktor ha u bnai Nohprah jong u snem 2023 u la sdang ban pyntrei ïa katei ka surok tang da kaba shu khlong ïa ka surok barim bad ieh khongreng khlem leh eiei shuh kaba ki paidbah ki hap ban mad jingeh shikatdei ha ka leit ka wan khamtam ha ka pang ka shitom.
Haba kren sha ki lad pathai khubor hadien ka jingïakren bad u EE ka PWD Nongpoh Division, u Bah Lawrence Nongrum, Chairman ka JAC u la ong ba na ka liang jong ki paidbah bad ka JAC ki ai por shi taïew ïa u kontraktor ba un sdang ban pyntrei biang ïa ka surok bad ban pyndep ha shwa u bnai Lber jong u snem 2025, ïa kaba na ka liang u Engineer ruh u la kular ban shimkhia ban bthah ïa u kontraktor ba un leh noh mardor kumba la dawa da ki paidbah.
Shuh shuh u Bah Lawrence u la byrthen ruh ba lada utei u kontraktor um lah satia ban leh ïa kitei ki jingdawa ki paidbah bad ka JAC kumba ki la dep ban ai da ka jingthoh sha u EE ka PWD Nongpoh Division, kin sa shim pat da kiwei ki sienjam kiba tyngeh pyrshah ïa kum kitei ki kontraktor kiba leh kamkai ïa ka kam bad buh jingeh ïa ki paidbah.
Ka Kong T Nongshli ka la pynpaw ba ka jingmih paidbah ha kane ka sngi kam dei satia ban ïa kdew kti ne ïa bishni ïano ïano, hynrei ki mih da ka jingshimkhia halor ka jingeh kaba ki paidbah kiba ïaid ba ïeng lyngba kane ka surok kaba ki paidbah ki hap ban mad.
Ka la kynnoh ruh ba u kontraktor uba pyntrei ïa katei ka surok, u la shu trei dusmon tang ban shu khlong ïa ka surok rim bad ieh khongreng kat haduh ka dor bai kali bai leit bai wan ka kiew arshah namar ka jingsniew palat pud jong ka surok ha kaba la dawa ruh ba lada utei u kontraktor um lah satia ban trei ïa katei ka kam, lah dei ban ai noh sha kiwei pat kiba lah ban trei ïa ka kam khnang ba kan nym buh jingeh ïa ki paidbah.
