Shillong, Naiwieng 07
Ka Williamnagar Market Association (WMA) na East Garo Hills ka la ujor bad kynnoh ba ki Nongïalam jong ka AHAM ki la donkti ha ka ban dawa pisa na ki nongdie dukan ha ka ïew Williamnagar.
Katkum ka khubor kaba la ïoh na ki pulit la ong ba na ka liang jong u Lahat N Marak uba dei u President jong ka Williamnagar Market Association ryngkat bad kiwei ki dkhot, ki la ujor pyrshah ïa u Tatara N Marak, uba dei u President jong ka AHAM Williamnagar Zone, ïa u Aimarong K Marak, General Secretary, Satwan Savio Ch Marak, u dkhot da kaba kynnoh pyrshah ïa ki, ba ki la donkti ban dawa pisa na ki nongdie dukan kiba shong die jingdie ha ïew Williamnagar ha East Garo Hills.
Ha kaba ïadei bad kane, na ka liang jong ki pulit ki dang pynlong ïa ka jingtohkit ban lap ïa ki jingshisha bad tynrai halor kane ka jingkynnoh dawa pisa jubor jong kitei ki Nongïalam ka AHAM.
