Shillong, Naiwieng 07
Ka Congress kaba la mad ïa ka jingshah iehnoh ha ki MLA bad MDC ha kine ki khyndiat bnai mynta kan sa nang ïoh mynsiem biang lyngba ka jingdon kiba wan pynïasoh kynthup ha ki konstitwensi kiba hap Shillong City.
Ha kane ka nongbah Shillong, ka jingwan kiba pynïasoh ka la sdang shwa na West Shillong konstitwensi ha kaba la pdiang ïa ki ha Congress Bhavan da u President Bah Vincent H Pala ha ka jingdonlang kiwei pat ki nongïalam ka Shillong City kynthup ïa u Dr Omarlin Kyndiah.
Kine kiba wan pynïasoh ki kynthup ïa u Bah Gerald Shullai uba ju don bad ka United Democratic Party (UDP) ha West Shillong konstitwensi bad ruh bad u Bah Paul Lyngdoh uba dei u MLA ba mynta bad Myntri Sorkar. Kiwei pat kiba kynthup ïa ki samla bad ki longkmie ki la rung sha ka Congress.
U Bah Gerald Shullai u la ong ba ha ka jingïohi jong u, ka Congress ha ka jingïaid lynti jong ka kum ka seng saiñ pyrthei la katta snem, ka la synshar bad ïaid ha ka lynti kaba dei.
“Ki paidbah ruh ki shem ba dei tang ka Congress kaba biang eh kum ka seng bad sngewthuh ba mynta donkam ban pynkhlaiñ biang ïa ka Congress nangne shakhmat,” la ong u Bah Gerald.
U la ong ba ma u bad kiwei pat ki wan rung sha ka Congress namar ka dei ka seng kaba ïalam ban pynpoi sha ka thong bad dei na kane ka daw donkam ban pynkhlaiñ biang ïa kane ka seng ha Ri Khasi Jaiñtia bad ha ka jylla baroh kawei.
“Ngam don daw ei ei bad u Bah Paul, u dei u nongïalam uba stad bad shemphang ha kaba ngi ruh ngi ïoh jingmut lang na u, hynrei hapoh ka seng ym dei ba pynïaid tang u Bah Paul marwei namar ki donlang kiwei ruh kiba pynïaid ïa ka UDP,” u la ong.
U la ong ruh ba u khlem wan sha ka Congress ban ïakhun ilekshon hynrei donkam ban khlaiñ ïa kane ka seng namar ïa ka ilekshon yn ïakren kham hadien ha kaba ka seng kan sa jied bad ibit ïano ban ïakhun.
U Dr. Omarlin Kyndiah uba dei u President ka Shillong City Congress Committee u la ong ba kiba bun ki paidbah mynta ki phaikhmat sha ka Congress bad ym don satia ka jingduh mynsiem wat lada ki don kiba phet bad iehnoh ïa ka seng.
U Bah Manuel Badwar u la ong ba ka Congress kam dei ka seng jong ki khyndiat ngut hynrei ka long salonsar jong ki paidbah. U la ong ba haba kiba wan rung sha ka Congress ki wan da ka jingieid bad jingsngewthuh ka long kaei-kaei kaba skhem khamtam haba ki paidbah mynta ki sngewthuh ba ka long kaba donkam ban pynkhlaiñ bad kyrshan ïa ka Congress ha kane ka Jylla bad ha ka ri hi baroh kawei.
Ha kawei pat ka liang, u Bah Pala u la ong ba ka seng ka khlem shongthait ban pynkhlaiñ ha kylleng ki konstitwensi da kaba pynlong ruh ki jingpynsngew shaphang ka saiñ pyrthei bad pynlong ruh ki jingai jinghikai shaphang ka ilekshon bad ki jngit ki jnat.
U Bah Pala u la ong ba ki dur thymmai ki don ha ka Congress mynta kiba don ruh ki jingtip bad jingshemphang kiba thymmai nalor ka jingpyndonkam ïa ka social media ha ka rukom kaba dei.
Haba ïathuh ba ki la don lypa shibun ki MLA barim bad MDC barim kiba kloi ban wanphai sha ka Congress, u Bah Pala u la ong ba ki don ruh ki nongïalam kiba la nang trei lypa bad ka seng ha kaba shen kin sa wan ban pynïasoh.
U la ong ba ha Shillong City, ki don ruh ki nongïalam na kiwei ki seng kum ha Nongthymmai konstitwensi kiba la ju don mynshwa bad ka Congress hynrei ki la don noh bad kiwei ki seng ha ka ilekshon MLA bad MP, hynrei mynta ki la pynkhreh ban wanphai sha ka seng ha kaba la pynkynriah noh sha ka 13 tarik mynta u bnai ba kin wan rung sha ka seng.
U la bynrap ba ha Umroi konstitwensi bad ha kiwei ki konstitwensi ruh ki la don shibun ki ban sa wan pynïasoh bad ka Congress.
