Ba jai-jai ka ilekshon MLA shiteng samoi ha Gambegre, donkam tang khyndiat ki kynhun pahara

Shillong, Naiwieng 08

Namar ka jinglong jai-jai ha ka jinglong-jingman jong kane ka ilekshon MLA shiteng samoi ha Gambegre konstitwensi, ka la kham pynsuk ïa ki bor pynïaid ilekshon bad na ka liang ki bor ba peit ïa ka suk ka saiñ ruh ki donkam tang khyndiat ki kynhun pahara ban peit bad khmih ïa ka jinglong-jingman naduh ka por ba dang ïaid ka jingïalap ilekshon haduh ban da poi ka sngi thep ‘vote’ bad sngi ñiew ‘vote’.

Ki pulit pahara kiba kynthup ïa ki pulit ka Jylla bad ki CRPF kiba dei ki pulit Central Armed Police Force (CAPF) ki la don lypa bad long kiba khreh na ka bynta ka jingpahara ha kane ka ilekshon.

Hadien ba ki bor ba dei khmih ki la dep ban peit thuh ïa ka jinglong-jingman bad lap ba ka long kaba jai-jai ha baroh kawei ka konstitwensi, kumta la pynbiang ruh ïa ki bor pahara katkum ka jingdonkam.

Ka Gambegre konstitwensi ka don 51 tylli ki jaka thep ‘vote’ bad ka jingdonkam ban phah ïa ki bor pahara ka long tang kumba shi kompani kaba kynthup lang ïa ki pulit CAPF bad ki pulit ka jylla.

“Ka jinglong-jingman ka long kaba jai-jai haduh mynta bad ym don kano-kano ka jaka thep ‘vote’ kaba don ha ka thup jong ka jingma ne kham jur ka jingma bad ngi kyrmen ba kan neh ka suk ka saiñ bad ïaid beit ïaid ïaid haduh ban dep lut ki kam baroh,” la pynpaw ki ophisar ba dei peit ïa ka jingpynlong ilekshon.

Ka jingdonkam ïa ki pulit pahara ka long tang shi kompani ha kaba ka rukom buh ïa ki pulit pahara kan long kumba lai kynhun. Napdeng kine, shi kynhun ki pulit pahara kin pahara ha ki jaka thep ‘vote’ ha ka sngi thep ‘vote’.

Ka jinglong jai-jai kane ka ilekshon shiteng samoi ha Gambegre ka paw shynna ruh na ka rukom ïalap ilekshon kaba kham jar-jar wat lada ki kyrtong kiba ïakhun ki dei kiba kham paw namar bad ka jingïakhun ka dei na ka bynta ka bor bad pynneh ïa ka burom khamtam eh ka NPP bad ka Congress.

Ka NPP ka hap ban jop ban ïoh knieh ïa ka Gambegre na ka Congress, katba ka Congress ka hap ban ïakhun tyngeh ban ïoh bat biang ïa kane ka konstitwensi kaba la ju mihkhmat da u MP ka Tura, u Saleng A Sangma ha kine ki phew snem ba la leit.

Ka jingdonkam ban pynlong ïa ka ilekshon MLA shiteng samoi ha Gambegre ka dei namar ba u Saleng u la iehnoh kum u MLA ka Congress ha ka 10 tarik u Jylliew mynta u snem namar ba u la shahjied kum u MP ka Ïingdorbar Thawaiñ Lok Sabha. U Saleng u la mihkhmat lynter kum u MLA ka Gambegre konstitwensi naduh u snem 2013 khlem pat shah rem ha ki ilekshon MLA.

Lada ka NPP ka jop ha kane ka ilekshon kan long ka jingshngaiñ khamtam hadien ba ka la mad ïa ka jingrem ha ka ilekshon Lok Sabha na baroh ar tylli ki konstitwensi kata na Tura bad Shillong parliamentary konstitwensi.

Ka jingïakhun ka long kaba jwat ha kaba ki don 6 ngut ki kyrtong kiba mih ban ïakhun. Ka NPP ka la pynïakhun da ka Dr. Mehtab Chandee A Sangma kum ka kyrtong kaba dei ruh ka kurim jong u Myntri Rangbah u Conrad K Sangma, katba ka Congress ka la sei da u Jingjang M Marak kum u kyrtong uba dei ruh u briew jong u MP ka Tura.

Kiwei pat ki kyrtong ki kynthup ïa ka Sadhiarani Sangma kaba dei ka kyrtong jong ka All India Trinamool Congress (AITC) bad ruh ka hep kynsi jong u Dr. Mukul Sangma uba dei u nongïalam ka Liang Pyrshah ha Ïingdorbar Thawaiñ ka Jylla bad ruh u Myntri Rangbah barim ka Jylla, nalor u kyrtong ka BJP u Bernard N Marak uba dei ruh u MDC bad ar ngut ki kyrtong shimet u Sengkrabirth M Marak bad u Jerry A Sangma.

Ka jingthep ‘vote’ kan long ha ka 13 tarik bad ka jingñiew ‘vote’ kan long ha ka 23 tarik mynta u bnai.