Shillong, Naiwieng 08
U Lat ka Jylla, u C.H. Vijayashankar u la bthah ïa ki nonghikai ka North Eastern Hill University (NEHU) ban phah ïa ki jingai jingmut jong ki halor kumno ban pynkut noh ïa ki kynrum-kynram kiba dang ïaid mynta ha kane ka skulbah.
Ïa kane, la ïathuh da u President ka NEHU Teachers’ Association (NEHUTA), Prof. Lakhon Kma ha ka Sngi Thohdieng hadien ka jingïakynduh jong ka seng bad MeTTA-NEHU ïa u Lat ka Jylla ban kyrpad ïa ka jingtuklar jong u khnang ban pynkut noh ïa ki jingeh kaba ka skulbah ka ïakynduh.
Haba kren sha ki nongthoh khubor, u Prof. Kma u la ong ba ka jingïalang ka la long kaba seisoh.
“Nga tharai ba u Lat u tip ïa kaei kaba jia naba u la pule ïa ki kot khubor bad ki lad pathai khubor man ka sngi,” u la ong.
U President u la ong ruh ba ki nonghikai ki sngewnguh halor ka jingshimkhia jong u Lat kum u Chief Rector jong ka skulbah da kaba bynrap ba u Lat u la kular ïa ki ba un shim ïa baroh ki lad ki lynti khnang ban wanrah biang ïa ka jinglong-jingman kaba ïaid beit hapoh ka skulbah.
U la ïathuh ruh ba namar ba u Lat un ym don shane bad un wanphai biang haduh ka 12 tarik mynta u bnai, kumta na ka liang jong ki, kin dang pynkhreh ïa baroh ki sienjam kiba donkam ban shim namar ba ki don bun bah ki jingeh kiba la ïalam sha kane ka jingïakhih.
“Kumta ngin sa wanrah ïa la ki jong ki jingai jingmut bad kumno ngi lah ban pynbeit ïa kine kiei-kiei baroh,” u la ong.
U Prof. Kma u la ong ruh ba ka jingsngewkhia ba kongsan jong u Lat, kumba long lem kiwei pat, ka dei ka koit ka khiah jong ki samla pule kiba don hapdeng ka jingïakhih shah thngan.
“Ka long kaba sngewsih namar khatduh hi, ka skulbah ka dei na ka bynta jong ki. Lada kim don, ngi ki nonghikai ruh ngim don, ym don mano-mano ruh. Ki briew, ki VC (Vice Chancellor), ki nonghikai, ki nongtrei ki lah ban wan bad leit hynrei ka skulbah ka dei ban sah na ka bynta ki samla pule jong kane ka Jylla ba itynnad, ka thaiñ baroh kawei bad hooid ka ri baroh kawei,” ong u nongïalam ka NEHUTA.
U la ong ruh ba ki nonghikai ki sngewkmen namar kum ka jingkylla, ki ïohi ba uba shong ha ka shuki u Lat – u don ka jingsngewthuh halor kumno ki kam ki ïaid.
“Ma u kum u Chief Rector u shimkhia bha ïa kane namar baroh ngi tip ba une u Vice Chancellor um shym la pyni kano-kano ka dak jingsngew pynban u la pyni ïa ka jingbym shimkhia ïa ki samla pule kiba ïakhih, bad kiba don hapdeng ka jingshah thngan,” bynrap u Prof. Kma.
Na ka liang u President ka NEHUTA u la ong ba ka jingthmu ba hakhmat eh jong ki ka long ban pynkut noh ïa kane ka jingïakhih shah thngan khnang ba ki samla pule kin ïoh leit phai biang sha ki klas jong ki – ha kajuh ka por, ban khmih ïa baroh ar ki lad ki lynti kiba shipor bad ki ban neh slem kumjuh. Haba kynthoh ïa u Vice Chancellor halor ka jingbym leh eiei ban pynkut noh ïa ka jingïakhih shah thngan, u Prof. Kam u la ong, “La kumno-kumno u la dei ban pyni ïa ka jingsngew na bynta ki samla pule. Mynta, phi dei u khlieh jong ka shlem pule bad hakhmat jong phi, habar ophis jong phi, ki samla ki don hangta, hapdeng ka jingshah thngan. Haba ki la wanrah ïa ki jingeh (hakhmat jong u), u la dei ban leh eiei noh mardor.”
Ha kawei ka liang, u Kma u la ong ba u Registrar bad u Deputy Registrar ki long ki bym larkam bad bynrap, “Ym don jingartatien ïa kata, ki long ki bym lah ban leh eiei. Um shym la leh eiei ban weng ïa ka jingeh jong ki samla pule bad ki nonghikai.”
