Shillong, Naiwieng 08
U dkhot EC jong ka NEHU-Teachers Association (NEHUTA), u Prof. Xavier P. Mao, ha ka Sngi Thohdieng u la ong ba lah ban weng noh ïa u Vice Chancellor (VC) ka skulbah, u Prof. Prabha Shankar Shukla katkum ka rukom treikam hynrei kan hap ban don ka jingtohkit ‘Visitorial Inquiry’ pyrshah ïa ki kam bad ki jingbym biang jong u.
Katkum ka jingong u Prof. Mao, ka jingtohkit ‘Visitorial Inquiry’ ka mut ba ka President ka ri India, kaba dei ka bor ba khmih ïa ki kam thung jong ka skulbah ka Sorkar Pdeng – Vice Chancellor, ka thaw ïa ka komiti tohkit.
U la ong ba lada ka jingmih na ka komiti tohkit ka long kaba sniew pyrshah ïa u, kata ka President ka India kaba dei ka nongwan jngoh ïa ka skulbah ka lah ban weng noh ïa u.
Na ka liang u Prof. Mao u la bynrap ba u Vice Chancellor u lah ruh ban hiar shuki da ka jingkitkhlieh.
