Shillong, Naiwieng 08
Ki pulit ka Ri-lum Garo ha ka janmiet 7 tarik Naiwieng, 2024 katba ki dang pynlong ïa ka jingtalasi ïa ki kali kiba ïaid ba ïeng ha ka thaiñ Dadenggre, hajan ka shnong Chibongre, kawei ka kali Alto ba lieh kaba don ïa u nombor AS-18-K-6601ka la sangeh kynsan kumba katto-katne mitar na ka jaka ba don ki pulit bad ka la pyrshang ban phet krad da kaba phai shadien.
Hadien ba ïohi ïa kane, katei ka pulit ka la mareh mar-mar ban pynsangeh ïa kane ka kali wat hapdeng ka jingthmu ban phet, hynrei kam shym la lah namarba rit palat ka surok bad kam lah ban phai.
Uwei na kiba shong hapoh kane ka kali u la ïoh ban mareh shabar bad lait phet katba ki 3 ngut kiwei pat kiba dang sah ki la shah kem noh ha ki pulit.
Hapoh kane ka kali Alto la ïadonlang u Hemjit Rabha (32 snem ka rta) na ka shnong Khardang, Assam, Lakingsbirth Marak (30 snem ka rta) na ka shnong Anogre, bad u Rikkam D. Sangma (27 snem ka rta) na Kama Dorenggre.
La ong ruh ba napoh kane ka kali, ki pulit ki la ïoh ban kurup ïa kawei ka pistol 7.65 na ka ‘dash board’, kawei ka khukri, kawei ka sopti ba lieh, kawei ka ‘bandana’ bad 3 tylli ki ‘mobile phone’.
Ha kaba ïadei bad kane, na ka liang ka tnad pulit ka dang pynlong ïa ka jingtohkit na bynta ban lap ïa ka tynrai jong kitei ki briew kumjuh ban tip halor kiwei pat kiba donkti.
