Shillong, Naiwieng 08
U dkhot ka Ïingdorbar Paliament ka Lok Sabha na Shillong Parliamen-tary Constituency, Dr. Ricky Andrew J. Syngkon u la ong ba ka shlem pule ka dei ban don ïa ka jingsngewtynnat bad ka ban long ruh ka jingmyntoi ïa ki khynnah pule bad kam dei ban don da kiwei pat ki jingpynthut la ka long ha ka skulbah North-Eastern Hill University(NEHU) ne wat ha kino-kino ki jaka pule ruh.
Kum ban shu kdew hangne, na ka liang ki samla pule ka skulbah NEHU ki la pynlong da ka jingïakhih shong shah thngan kaba khlem buh por hapoh ka phyllaw jong ka skulbah naduh ka 5 tarik u Naiwieng 2024 ban dawa hiar shuki mardor ïa u Vice-Chancellor (VC) ka skulbah, u Prof. Prabha Shankar Shukla hadien ka jingdonkti jong u ban thung kam be-aiñ ïa u Registrar, Deputy Registrar bad kiwei ki ophisar bad dawa ruh ba u dei ban weng kam mardor ïa ki nalor ka jingmih ki jingkynnoh pyrshah ïa u ba u dei u VC uba isih ïa ki trai ri-trai muluk bad kumjuh ruh halor ka jingbym treh thung kam ïa ki Pro Vice-Chancellor ha Shillong bad Tura NEHU Campus da ki trai muluk-trai jaka nalor ki kiwei-kiwei.
Haba kren bad ki nongthoh khubor ha ka 8 tarik Naiwieng 2024, hadien ka jingïalang pynkup burom ïa ki samla ba la pass shakhmat ha ki jingpule bapher-bapher ba la pynlong da ka Seng Samla Wahingdoh, u Dr. Ricky u la ong ba kam long kaba sngewtynnad ba ki khynnah kiba dei ban don ha ki kamra klas ban sngap ïa ki jingbatai hynrei ki la hap ban mih shabar ka kamra klas ban pynlong ïa ka jingïakhih bad kane ka la ktah ïa ka pule-puthi bad ïa ka lawei jong ki khynnah. Na ka liang jong u ruh kum u nongmihkhmat, u kyrmen skhem ba kane ka jingïakhih kaba la pynlong da ki samla pule ka skulbah NEHU hapoh ka jingïalam jong ka NEHUSU kan poi noh sha kaba kut.
“Kano-kano ka jingïakhih khamtam kaba ki khynnah kin hap ban mih na ki kamra klas shabar, ka long kaei-kaei ka bym sngewtynnat kaba ktah ïa ka pule-puthi, kaba ktah ruh wat ïa ka lawei jong ki”, ong u Dr. Ricky.
U la ong ba kum ki khynnah pule, ki nonghikai bad ki bym dei ki nonghikai hapoh ka skulbah NEHU, ki la pynpaw bad pynsngew ïa ki jingdawa kiba shongnia bad ka jingangnud jong baroh kiba don hapoh ka skulbah ka long kumno ban tei, ban pynbha bad ban kyntiew ïa katei ka skulbah.
“Ïa kano-kano kaba ngi kwah ban pynbha, bad haba ngi ïohi ba ka don ka jingduna bad ka jingdkoh, kum kata baroh ngi kyrshan”, ong u Dr. Ricky.
Shuh-shuh u Dr Ricky u la ïathuh ba u la dep ban thoh da ka shithi sha u Myntri ka tnad Pule-Puthi ka Sorkar India ba un peit bad tuklar lem halor ki kynrum-kynram kiba la jia hapoh ka skulbah NEHU.
