Tura, Naiwieng 08
Ka jinglehniam ‘Rugala’ kaba long ka sngi ba-ar jong ka tamasa 100 ksing ne tamasa ‘Wangala’ kaba 48 ka la long ha Wangala A’dam, Chibragre ha ka Sngi Thohdieng.
Ha kane ka sngi, u Registrar General ka ïingbishar ba ha khliehduh ka Jylla, u Bah E. Kharumnuid, MHIS u la long kum u Kongsan ha ryngkat ka jingdonlang kiwei-kiwei ki kynrem ki lyndan.
Lah ban kdew ba shisngi shuwa ka ‘Wangala’, ka ju don ka jinglehniam kaba la tip kum ka ‘Rugala’ kaba la shim bynta da u Nokma bad ha kane ka jingleh niam, ka jingtyrwa jong ka kti banyngkong ïa ka ‘iad khaw ba kyrpang ha ryngkat bad u khaw ba la shet bad ki jhur la ai sha u Misi Saljong, U Nongai Bakhraw.
Haba ai khublei kyrpang ïa ki paidbah Garo ha kane ka sngi, u Registrar General ka ïingbishar ba ha khliehduh ka Jylla, u Bah E. Kharumniud u la pynpaw ka jingsngewnguh ïa ki dkhot jong ka Wangala Committee ha kaba u la ïoh ban sakhi ïa kane ka tamasa.
Haba kdew ba kane ka dei ka jinglehniam ainguh, u la ong ba iwei-pa-iwei ki dei ban sngewnguh ïa ki jingkyrkhu kiba bun kiba ïoh pdiang bad bynrap ba kane ka jinglehniam ainguh kan wanrah ïa ka suk ka saiñ bad ka roi ka par ha ka imlang-sahlang bad kumjuh ïa ki paidbah ka Jylla.
U la pynpaw ruh ka jingkyrmen ba kane ka tamasa kan sa kiew sha ki kyrdan ba halor ha ki por ban wan bad pynsaphriang ïa ka khubor jong ka jingieid bad jingïalong shipara hapdeng ka imlang-sahlang.
U Chairman ka Hundred Drums Wangala Festival Committee, u Ronald Rikman Sangma u la pynpaw ba ka jingpynlong ïa ka tamasa kaba khraw tam jong ki Garo ka dei ka jingsngewsarong ïa ki bad ka lah ban pynneh-pynsah bad pyninam ïa ka riti-dustur ba riewspah jong ki Garo sha kiwei pat.
Haba pyntip ba ki kam pynroi haba ïadei bad ki jingtei ha Garo Heritage Village ki dang ïaid shakhmat ha la ki jong ki jong ki kylla, u la ong ba dang don bun bah kiwei pat ki kam kiba dang hap leh ha ki por ban wan bad pynpaw ka jingsngewnguh ïa ka Sorkar halor ka jingkyrshan kaba man ka por bad khmih lynti ba ka Sorkar kan ïai bteng ïa ki jingkyrshan jong ka ban pyndep ïa ka projek.
Lait na ka lehniam ‘Rugala’, ka sngi kaba ar jong ka tamasa ka la sakhi ruh ïa ka jingïakop ‘Folk Song’ kaba la pynlong da ka jingthmu ban kyntiew ïa ki jingrwai tynrai bad ki tiar tem jong ka jaidbynriew Garo.
