Shillong, Naiwieng 08
U President ka Megha-laya Pradesh Congress Committee (MPCC), Bah Vincent H Pala u la ong ba kam long kaba bha ban leit leh politik ïa ka jingïakhih ki samla pule ha NEHU.
Haba kren halor ka jingïakhih ha katei ka skulbah, u MP barim ka Shillong u la ong, haba ki briew na NEHU ki leit ban ïakynduh ïa u halor ki kam ka NEHU um ju treh ban ïakren ei-ei namar u sngew ba kam bha kum u ‘riew saiñpyrthei ban tuklar ha ki kam ka NEHU.
U la ong ba naduh ka por ba u dang dei u MP um ju kwah ban kren paidbah pyrshah ïa ka NEHU.
“Shu buh mynta lada kum u MP nga kren ïa kane ka kynrum-kynram bad jingjia hapoh Parliament, da ki phew lak ki briew kin ïohi, kane kan ktah ïa ka burom jong ka skulbah, namar ki don bun ki briew kiba shim ïa ka NEHU ba ka dei ka jaka pule kaba bha”, la ong u Bah Pala.
U la ong ba lada ki briew ki leit ban ïathuh ei-ei ïa kaba jia ha NEHU, u sngap bad phah pat da ka jingthoh lane u leit ban ïakynduh beit ïa ki Myntri ba dei khmih jong ka Sorkar Pdeng. Ki samla pule ka North Eastern Hill University (NEHU) hapoh ka jingïalam ka NEHU Students’ Union ki la khluit tar ïa ka jingmynthi jong u Vice Chancellor, u Prof. Prabha Shankar Shukla ban sngap ïa ki jingdawa ki samla pule ban weng kam ïa u Registrar, u Deputy Registrar bad kumjuh ïa ki ophisar ki bym dei hok ban shah thung kam. Kane ka jingmynthi jong u VC ka la pynlong ïa ki samla pule ban rai shah jingit khlem buh por bad dawa syndon mynta ïa u VC ban hiar shuki. Katkum ka jingong u Bah Pala, ha kane ka jingïakhih ba mynta da ki samla NEHUSU ruh ki la don ki briew kiba ai jingmut ïa u ban leit mih sha NEHU, hynrei u la kyntait da kaba ong ba ym dei ban pynïakhleh kam saiñpyrthei ha ka jaka pule. “Kum ka seng saiñpyrthei nga sngew ba ngim dei ban leit tuklar namar ka lah ban ktah jur, lada leit ka Congress kan sa leit sa ka BJP, kiwei ki seng ruh kin sa leit kan kylla pynban ka jaka ba dap da ki ‘riew seng saiñpyrthei, kane kan nym bha lane itynnat ïa ka lawei jong ka NEHU”, la ong u Bah Pala.
