Shillong, Naiwieng 08
U Lamphang ka Ïingdorbar Thawaiñ ka Jylla u Thomas A Sangma u la kdew ïa ki jingbym biang ha ki kot mudui pyrshah ïa ki lai ngut ki MLA ka Congress kiba la phet seng.
Dang shen u Lamphang u la pynmih kawei ka hukum ha kaba la kdew ba ki don ki jingduna ha ka kot jingmudui (petition) kaba la phah da ka Congress bad u nongïasaid aiñ jong ka. Ki jingduna ki dei ka jingbym soi jong u nongmudui ha baroh ki kot mudui kiba ka Congress ka la phah sha u Lamphang pyrshah ïa ka jingpynïasoh NPP jong lai ngut ki MLA.
Na ka liang ki nongïasid aiñ ka All India Congress Committee (AICC) ki la pynbeit ïa kita ki jingduna bad phah biang ïa ki kot mudui sha u Lamphang ha kaba mynta ki dang ap ïa ka rai ban pynmih da u Lamphang ka Ïingdorbar Thawaiñ ka Jylla.
La ong ba lada u Lamphang u pynslem ban ai ïa ka rai, ka AICC kan mudui noh sha ka Ïingbishar.
Lah ban pynkynmaw ba ki lai ngut MLA ka Congress kiba la phet noh bad leit ban ïasoh bad ka NPP ki long u MLA ka Umsning, Dr. Celestine Lyngdoh, u MLA ka Nongstoiñ, Bah Gabriel Wahlang bad u MLA ka Mawhati, Bah Charles Marngar.
Kine lai ngut ki la shah mudui pyrshah ha la ka jong ka jong ban pyntroiñ ïa ka Congress.
