Shillong, Naiwieng 08
Ki nongkitkam jong ka Central Executive Committee ka Voice of the People Party (VPP) kim pat lah ban shim rai ïa ki kyrtong ha ki lai tylli konstitwensi na ka bynta ka ilekshon MDC sha Khasi Hills Autonomous District Council (KHADC) ba la mihkhmat da ki ar ngut MLA ka VPP kata ha Mawlai konstitwensi, Jaïaw konstitwensi bad Mawkhar-Pynthorum-khrah konstitwensi kiba hap ha sor Shillong.
Ha Mawlai konstitwensi la mihkhmat da u Bah Brightstarwell Marbaniang kaba don tang kawei ka konstitwensi ha ka ilekshon MDC bad ha North Shillong konstitwensi ba la mihkhmat da u Bah Adelbert Nongrum ki don ar tylli ki konstitwensi ha ka ilekshon MDC, kita ka Jaïaw bad Mawkhar-Pynthorumkhrah konstitwensi.
Katkum ki khubor ba la ïoh lum ba ha kine ki lai tylli konstitwensi ba la don lypa ki MLA, ka VPP kam pat lah ban pynbna namar ki don bun ngut kiba pan tiket.
Ki khubor ki ïathuh ba ha Jaïaw konstitwensi ki don kumba hynriew ngut ki kyrtong kiba pan tiket kiba kynthup ïa u Bah Denzil Chen, Bah Strong Kharjana, Bah Den Hill Lyngdoh Talang, Bah Reginal Thabah, Bah Nickson Dohling bad uwei bym pat ïoh kyrteng.
Katba ha Mawlai konstitwensi ki don kumba hynñiew ngut kiba pan tiket, tangba khlem shym la ïoh kyrteng bad ha Mawkhar-Pynthorumkhrah konstitwensi ki don palat saw ngut.
Nalor kitei lai tylli ki konstitwensi, ka Sohïong konstitwensi ruh ka dei kawei kaba ki nongïalam ka VPP ki kham jwat ban shim rai ban pynskhem ïa u kyrtong namar ki don kumba phra ngut.
Namar kata, ka CEC kan sa shong jingïalang biang ban pynskhem sa ïa ki 11 tylli konstitwensi kiba dang sah ynda ka State Election Committee ka la bishar bniah namar ïa ki 18 tylli ki konstitwensi la dep pynskhem ïa ki kyrtong ha kine khyndiat sngi ba la dep.
Ki konstitwensi kiba dang sah ki long ka Mawlai, Jaïaw, Mawkhar-Pynthorumkhrah, Sohïong, Jirang, Umroi, Nongstoiñ, Rambrai, Mawkyrwat, Laitumkhrah bad Mawhati.
Katba ha Jaiñtia Hills Autonomous District Council ka VPP ka la dep pynskhem ïa ki 12 ngut kyrtong na bynta ki 12 tylli konstitwensi bad kaba dang sah mynta sa 17 tylli ki konstitwensi.
