Shillong, Naiwieng 08
U President ka Meghalaya Pradesh Congress Committee (MPCC), Bah Vincent H Pala u la ong ba ka ilekshon MLA shiteng samoi ha Gambegre konstitwensi ka dei ka bynta jong ka Congress ban pynmih MLA thymmai. U la ong ruh kham mynshwa ki don kiba kren pyndiaw ba ka Congress ka don ha balai, hynrei mynta, ka Congress ka la kiew bad kan wan banyngkong ha kane ka ilekshon.
U Bah Pala u la pynpaw ïa kane ka jingsngew skhem ha ka Sngi Palei haba kren sha ki lad pathai khubor halor ka jingïakhun u kyrtong ka Congress ïa ka ilekshon MLA shiteng samoi ha Gambegre konstitwensi.
U la ong ba kham mynshwa ki don kiba ong ba u kyrtong ka Congress u don ha balai hynrei ynda la ïaid ki sngi sha ka ilekshon ki paidbah ki la phai sha kane ka seng bad mynta ka Congress ka don ha ka bynta ban long nyngkong namar ba ki paidbah ki sngewthuh ba donkam ban ailad biang ïa ka Congress ha kane ka ilekshon shiteng samoi namar u MLA uba mihkhmat bad long mynta u MP na Tura u dei uba mihkhmat na ka Congress.
U Bah Pala uba la leit ruh sha Gambegre ban ïalap ilekshon ha kine ki khyndiat sngi, u la ong ba ki paidbah ki la poi sha ka jingïalang jong ka Congress ban ai jingkyrshan bad da ki hajar ngut kiba kyrshan ïa ka NPP bad TMC ki la phai biang ban kyrshan ïa u kyrtong ka Congress ha kane ka ilekshon MLA shiteng samoi.
U la ong ba ki paidbah ka Gambegre ki sngewthuh ba ka long kaba donkam ban phaikhmat sha ka Congress namar ki mad shibun ki jingeh naduh ba synshar da kiwei pat ki seng.
Ka Congress ka la sei da u Jingjang M Marak kum u kyrtong ha kane ka ilekshon shiteng samoi bad na ka liang u MP ka Tura, u Saleng A Sangma u la leit ban ïalap ilekshon kylleng na ka bynta ka seng bad u kyrtong.
Ha ki katto-katne ki jingïalang ïalap ilekshon ha Gambegre kiba u Saleng u la leit ban ai jingkren, la ïohi ba ki paidbah ki la tuid bha ban wan sngap bad ai jingkyrshan.
