Shillong, Naiwieng 08
U Prof. Prabha Shankar Shukla, Vice-Chancellor jong ka North-Eastern Hill University (NEHU), u la khot ïa ka jingïalang kaba kyrkieh jong ka Executive Council ha ka 8 tarik u Naiwieng 2024 ban weng ïa ki jingeh ba kongsan ba la pynpaw da ka seng ki samla pule jong ka North-Eastern Hill University Students’ Union (NEHUSU).
Ka jingkhot u Prof. Shukla ïa kane ka jingïa-lang ka long kum ka jingpyrshang ban weng ïa ki jingeh ba la pynpaw da ka NEHUSU, kaba kynthup ïa ka jingdawa ba dei ban weng noh ïa u Registrar bad Deputy Registrar bad ban thung ïa ki Pro-Vice-Chancellor na ka bynta ki jaka pule jong ka NEHU ha Shillong bad Tura.
Hynrei namar ka jingdon ka jingthut namar ka jingïakhih jong ki samla pule, ym shym la lah satia ban pynlong ïa ka jingïa-lang jong ka Executive Council. Kane ka la khang lad ïa ka bor pynïaid jong ka Skulbah ban ïaid shakhmat ha ka ban weng ïa ki jingdawa jong ki samla pule.
Haba pynpaw ïa ka jingsngewkhia jong u na ka bynta ka jingbha jingmiat jong ki samla pule, u Prof. Shukla u la bynrap, “Nga la pyrshang ban ïashim bynta ha ki jingïakren bad ki samla pule ban weng ïa kine ki mat bad nga la kyntu ïa ki ban pynkut noh ïa ka jingshah thngan jong ki, namar nga sngewkhia jur ïa ka jingktah kaba lah ban mih na ka ka jingkoit jingkhiah jong ki. Hynrei la ai jingmut ïa nga da u Majistor ban kiar na kaba leit jngoh ïa ki katto-katne ki jaka namar ka jingsngewkhia ïa ka jingshngaiñ.”
U Prof. Shukla u la pynksan ïa ka jingkular jong u ban wad ïa ka lad ka ban tei hynrei u la kdew ba khlem ka jingïakren kaba laitluid, yn nym satia ban poi shano-shano ruh hynrei kan sahkut hajuh. U la kyrpad ïa ki samla pule lyngba kane ka jingpynbna pathai khubor, da kaba kyntu ïa ki ban pynkut noh ïa ka jingshah thngan bad ban ïashim bynta ha ka jingïakren kaba don jingmut ban weng ïa ki jingeh mardor.
“Nga kyrpad jur ïa ki samla pule, lyngba ki lad pathai khubor, ban weng noh ïa ka jingshah thngan bad ban ïatreilang bad ngi ban wad ïa ki lad ki lynti. Khlem ka jingïakren, ki kti jong nga ki shah teh,” u la bynrap.
U Vice-Chancellor u la pynskhem biang ïa ka jingkular jong u ban weng ïa ki jingeh jong ki samla pule ha ka rukom kaba shngaiñ bad kaba ïatreilang da ka jingkyrmen ba ka jingïakren kan long noh kham kloi.
