Shillong, Naiwieng 08
Ka All Meghalaya SSA School Teachers’ Association (AMSSASTA) ha ka 7 tarik u Naiwieng 2024, ka la pynpaw ka jingsngewnguh ïa ka Sorkar halor ka jingpynduna ïa ka ‘pass mark’ ha ka Meghalaya Teacher Eligibility Test (MTET) kaba ju long na ka 60% sha ka 45% na ka bynta ki nonghikai SSA.
Na ka liang ka kynhun ka la leit ban ïakynduh ïa u Commissioner & Secretary ka Sorkar Jylla, u Vijay Kumar Mantri, IAS, ha katei ka sngi ban buddien ruh ha kaba ïadei bad ka jingpynkhreh jong ka Sorkar Jylla ïa ki mat jingdawa ban kyntiew tulop da 100% na ka bynta ki nonghikai SSA nalor kiwei-kiwei.
Haba kren sha ki lad pathai khubor, u President ka AMSSASTA, Bah Peter Thyrniang u la ong ba na ka liang u Commissioner & Secretary u la ong ba u la pyrshang katba lah na ka liang jong u ban pynsted ïa kane ka kam hynrei namar ka jingbym don jong u Myntri ka pla tyngka ka Sorkar Jylla bad ha kajuh ka por uba dei ruh u Myntri Rangbah ka Jylla, u Conrad K. Sangma, kumta um pat lah satia ban shim ïa kano-kano ka rai kaba biang halor kane ka bynta.
U Bah Thyrniang u la ong ba utei u Commissioner & Secretary u la pyntip ruh ba un sa leit sha Delhi ban ïatai sani bha halor ki mat jingdawa jong ki nonghikai bad kumjuh ïa kiwei-kiwei ki jingdonkam jong ka Jylla.
“U la ong ruh ba na ka liang jong u, un sa pynlong ïa ka komiti jong ka pisa tyngka hapoh ka Jylla ha kine ki sngi ki ban sa wan ba kin shim ïa ka rai kaba kham bit katkum ka jingdawa jong ngi”, bynrap u Bah Thyrniang.
Shuh-shuh u Bah Thyrniang u la ïathuh ba ha ki sngi ki ban sa wan, na ka liang ka kynhun kan sa leit ban ïakynduh biang ïa u Commissioner & Secretary ban buddien ïa ka jingpynkhreh jong ka Sorkar halor ka jingdawa ka kynhun.
Na ka liang u General Secretary ka AMSSASTA, u Bah Wanpyndaphi Lapang u la pynpaw ka jingsngewnguh ïa ka Sorkar ba ka lah pynduna ïa ka ‘pass mark’ ha ka Meghalaya Teacher Eligibility Test(MTET) kaba ju long na ka 60% sha ka 45% na ka bynta ki nonghikai SSA.
“Mynta u la kular ha ngi ba un thaw lad-thaw lynti ba un ai noh 45% na ka bynta kane ka ‘pass mark’ jong ka MTET bad kane ka dei kawei ka lad-ka lynti ka ban ïarap ïa ngi ki nonghikai SSA ba ngin lah ban pynlong ïalade ki nonghikai kiba tbit bad ba ngin lah ban long kiba ïaryngkat lem bad kiwei pat ki para nonghikai”, ong u Bah Lapang.
