Shillong, Naiwieng 10
Ki bor pynïaid jong ka Purno Sangma International Medical College, kaba don ha skulbah USTM Ribhoi District ka la weng noh ïa ki 13 ngut kiba pule doktor bad pynphai noh ïa ka bai rung jong ki namar kane ka bhah ka dei jong ka jylla Meghalaya.
Katkum ka jingpynbna da ka tnat ka koit ka khiah jong ka Sorkar Jylla myn ha ka 8 tarik mynta u Naiwieng, 2024, la ong ba ka Purno Sangma International Medical College ka la ai bhah haduh 64 tylli ïa ki samla ban pule doktor kita ïa ki Unreserved Category-9 ngut, Khasi & Jaiñtia-26 ngut, Garo-26 ngut, SC/OBC-3 ngut.
Namar la ong ka bhah jong ki Garo kim lah pyndap ïa ki 11 ngut ki samla bad ka bhah jong ki SC bad OBC 2 ngut, kumta ki bor pynïaid ka PIMC ki la shim noh ha lade ïa katei ka bhah ban pynrung noh da kiwei ki samla khlem da ïoh jingbit na ka tnat ka koit ka khiah.
Hadien ka jingshong bishar bniah biang, ka tnat ka koit ka khiah ka kwah ba kine 13 tylli ki bhah ki dei ban leit biang sha ka Sorkar Jylla khnang ban thep da kiwei ki samla kiba lah na bynta ka jingmyntoi ki samla.
Kumta hadien ba la pynbeit ïa kine baroh, ki bor pynïaid ka PIMC ka la weng noh ïa kine ki 13 ngut ki samla bad phah pynphai noh ïa ka pisa, khnang ba ka Sorkar Jylla kan thep bujli da kiwei ki samla.
Kum ban shu pynkynmaw, u MLA ka Mawlai u la hiar sha ka skulbah USTM kaba la buh ruh ïa kane ka jaka pule doktor ha Ribhoi District bad leit ïakynduh ruh ïa ki ophisar ha Additional Secretariat ban dawa ba ïa katei ka bhah ba kiwei ki jaidbynriew kim lah ban pyndap na ka bhah jong ka jylla Meghalaya bad dei ban pyndap da ki samla kiba lah khnang ba kane ka bhah kan ym lehnohei.
