Nongpoh, Naiwieng 11
Uwei u shipai jong ka ri India ba la tip kyrteng kum u Aibok Madur uba trei kum u Sepoy ha ka GOC, Fire and Fury Corps jong ka Indian Army, u la duh noh ïa la ka jingim ha ka jingïakhun pyrshah ïa ki nongshun ha ki bynta jong ka Siachen Glacier jong ki lum thah Makashang ha ka jylla Jammu & Kashmir ha ka 7 tarik u Naiwieng, 2024.
Ïa ka met kaba sah jong une ‘riewshlur ka Jylla uba la len lade bad aiti ïa la ka jingim ban ïada ïa ka ri, la wan pynpoi da ki shipai hynnin ka sngi ha ka shnong Mawbri kaba hap ha Umroi konstitwensi jong ka Ri Bhoi District. Na ka liang jong ki shipai, ki la pynlong ruh ïa ka jingpyndonburom khatduh ïa ka met kaba sah jong une u ‘riewshlur ryngkat ka jingsiat suloi shwa ban aiti pat sha ki bahaïing-bahasem.
U Myntri Rangbah ka Jylla, Conrad K Sangma haba thoh ha ka rynsan X, u la pynpaw ïa ka jingai burom kaba kyrpang ïa u shipai Aibok Madur, da kaba ong ba une u ‘riewshlur u dei uba don ïa ka mynsiem ieid ri kaba shisha bad kane ka jinglen lade ka jong u yn ym lah satia ban klet.
U la pynpaw ruh ïa ka jingsngewnguh ïa ka jingshlur jong une u shipai uba aiti ïa la ka jingim ha ka jingshakri ha ka kam ban ïada ïa ka ri ha Siachen.
“Ngi ai khublei ïa ka jingshlur jong u Sepoy Aibok Madur ka Assam Regiment, uba la aiti ïa ka jingim ha ka kam jong u ha ka 7 tarik u Naiwieng, 2024, ha Siachen. U Sepoy Madur uba na ka shnong Mawbri, ha Ri Bhoi District jong ka jylla Meghalaya, u la pyni ïa ka mynsiem ieid ri kaba shisha,” ong u Myntri Rangbah.
“Ka jingsngewlem jong ngi, ka leit sha ka ïing ka sem jong u Sepoy Madur bad ngi ïeng ha ka jingïatylli bad ki ha kane kum ha kane ka khyllipmat jong ka jingsngewsih. Ka Sorkar Jylla ka ai ka jingkyrshan kaba pura bad ka jingsngewlem ïa katei ka longïing kaba la duh noh ïa u Sepoy Madur,” ong u Conrad.
Ha kawei pat ka liang, u Myntri Rangbah u la pynbna ba ka Sorkar Jylla kan ai T.20 lak sha ki bahaïing-bahasem jong u Sepoy Aibok Madur, u shipai jong ka 10 Batallion jong ka Assam Regiment uba la khlad noh da kaba len lade ïa la ka jingim ha Siachen ha ka 7 tarik u Naiwieng.
