Shillong, Naiwieng 10
Ki ‘riewngeit da ki hajar jong ka Balang Katholik ha ka Sngi U Blei ki la mih ban ïashimbynta ha ka Eucharistic Proce- ssion kaba ju long man la u snem ha ka Cathedral of Mary Help of Christians kaba don ha Laitumkhrah hapoh jong ka Shillong Archdiocese.
La sdang ïa kane da kaba pynlong ïa ka jingduwai ha ka por mynstep bad hadien kane lapynlong ïa ka Mass Bakhuid ha ka por 9:15 mynstep kum ka dak jong ka sdang ïa ka proseshon.
Ïa kane ka Mass Bakhuid la ïalam da u Shillong Archbishop, u Most Rev. Victor Lyngdoh ha ryngkat ka jingdonlang jong kiwei pat ki Bishop kiba kynthup ïa u Most Rev. Wilbert Marweiñ jong ka Nongstoiñ bad u Most Rev. Ferdinand Dkhar jong ka Jowai.
Ha ka por 1:30 mynsngi la sdang ïa ka jingïaid proseshon kaba la sdang na ka jaka jong ka Calvary sha ka thaiñ Dhankheti, Shillong-Jowai Road, Laitumkhrah Main Road, Don Bosco Square bad la wanphai biang sha Calvary.
Kane ka Proseshon bah ka la khring ïa baroh ki ‘riewngeit Katholik na ka nongbah Shillong bad na ki Archdiocese kum na Jowai bad Nongstoiñ, ha kaba ki surok ki la shlei bad dap da ki ‘riewngeit kiba ïashimbynta ha katei ka proseshon kaba shisien shi snem. Ïa kaba la tip kum ka ‘Corpus Christi’ ne ‘Ka Met jong u Khrist’ ka dei kaba la leh naduh u snem 1247 ha Liege, Belgium bad ka la kylla long kaba kongsan bha ha ki Balang Katholik kiba don ha kylleng ki ri.
