Shillong, Naiwieng 10
U Myntri Rangbah ka Jylla, u Conrad K. Sangma u la kynjoh sha u Myntri ka tnad pule-puthi ka Sorkar Pdeng, u Dharmendra Pradhan ban kyrpad tuklar halor ki kynrum-kynram kiba dang bteng mynta ha North Eastern Hill University (NEHU).
“Nga la pynsngew sha u Myntri ka tnad pule-puthi ka Sorkar Pdeng, @dpradhanbjp halor ka jinglong-jingman kaba mynta ha NEHU bad kyntu ïa u ban wad ïa ka lad jingpynbeit ka ban poi sha ka jingïasuk haba ïadei bad kane ka mat,” thoh u Sangma ha ka rynsan lad pathai.
Kum ban shu kdew hangne, ka Khasi Students’ Union – NEHU Unit (KSU-NU) ha ryngkat ka jingïatreilang bad ka NEHU – Students’ Union (NEHUSU) ha ka 5 tarik mynta u bnai ki la sdang ïa ka jingïakhih shong kyllaiñ mungor bad jingshah thngan ba khlem buh por namar ka jingkuman u Vice-Chancellor ka NEHU, Prof. Prabha Shankar Shukla ban pynurlong ïa ki jingdawa jong ki.
Hashuwa, kine ar seng ki la ai por haduh ka shiteng synñia jong ka 4 tarik u Naiwieng ïa u VC ban weng kam noh shi syndon ïa u Registrar, Deputy Registrar lem bad kiwei pat kiba la shah kynnoh thung kam be-aiñ ha ka skulbah.
Ha ka Sngi Palei, ka NEHUSU bad KSU-NEHU Unit ki la khang tala ïa ki khyrdop jong ka skulbah ban khang ïa ka rung ka mih sha skulbah bad thang ruh ïa ki tyngshop jong u Vice-Chancellor, Registrar bad Deputy Registrar.
Ka NEHU Teachers’ Association (NEHUTA) lem bad ka MeTTA-NEHU ha ka Sngi Thohdieng ki la ïakynduh ïa u Lat ka Jylla, u C.H. Vijayashankar ban kyrpad ïa ka jingtuklar jong u khnang ban pynkut noh ïa ki jingeh kaba ka skulbah ka ïakynduh.
