Shillong, Naiwieng 10
Kan long shisha ka burom ïa ka jaidbynriew kaba rit paid ha ka ri India bad ïa ka Jylla Meghalaya namar u Steve Jyrwa u la ïoh ban rah ïa ka nam lahduh ha ka final India’s Best Dancer Season-4 kaba la pynbna ha ka Sngi U Blei.
Kane ka jingïakob shad ka la ïaid mynta la lai bnai kynthih ha kaba u Steve u la shong la sah beit ha Mumbai naduh ba sdang ka jingïakhun.
U Steve u la ïoh ban rah ïa ka nam lahduh ryngkat ka song pisa kaba T.15 lak bad ka kali Maruti Swift kum ka khusnam.
Ha ka final jong kane ka jingïakob shad, ki don hynriew ngut lem bad u Steve. Kumta u Steve u la ïoh ban pynliem ïa kine ki san ngut kiba dei na ki jylla kiba heh ha ri India kum Harsh Keshi, Nextion, Nepo, Akanksha Mishra aka Akina, Aditya Malviya.
Haba u nongthoh khubor u la ïoh ban ïakren bad ka kmie u Steve, ka Kong Bibi Jyrwa kaba don mynta ha Mumbai, ka la ai khublei ïa ki paidbah ka jylla Meghalaya, ka Sorkar Jylla bad ïa ki bahaïing-bahasem kiba la kyrshan ïa u Steve ha kane ka jingïakob shad.
Ka la ïathuh ba u Steve naduh ba u leit ban ïakhun ïa kane ka jingïakob u sah beit sha Mumbai bad shen yn sa pyntip ynda wanphai sha Shillong.
Ka la pyntip ba ka la leit sha Mumbai ha kine ki sngi ban leit synran haba u Steve un shad ha ka final.
“Kane kam dei shuh ka jingjop tang jong u Steve hynrei ka dei ka jingjop ïa ka jylla Meghalaya,” ka la ong.
Ka la ïathuh ba ka jingjop u Steve ka long 50 persen na ka ‘voting’ bad 50 persen na ka sap ba u shad.
Shuh shuh ka Kong Bibi ka la pynthikna ruh ba u Steve u la ïoh rah ruh ïa ka song pisa kaba T.15 lak tyngka bad kawei ka kali Swift.
Ki nongbishar ha kane ka jingïakob naduh basdang ki long ka puron phlim Hindi ka Karishma Kapoor, Geeta Kapur, bad u Terence Lewis.
