Shillong, Naiwieng 10
Ïa ka jingtohkit halor ka jingkynnoh jong ka jingdon ka bamsap ha kaba ïadei bad ka projek surok Shillong-Nongstoiñ-Rongjeng-Tura la aiti sha ka tnat Criminal Investigation Department (CID).
La sngewthuh ba ka Director General of Police (DGP) ka Jylla ka Kong Idashisha Nongrang ka la pynmih ïa ka hukum na ka bynta ka jingtohkit CID.
Ka tyllong khubor ka la ong ba hadien ka jingshimti, ka CID mynta kan hap ban thung ïa u Investigating Officer (IO) ban pynïaid shakhmat ïa ka jingtohkit. Ïa u IO yn ïarap da ka kynhun jong ki ophisar. Katba ïa u IO barim jong ka tnat pulit la bthah ba un aiti noh ïa baroh ki kot ki sla bad ki jingdonkam baroh kiba ïadei bad kane ka kam sha ka CID.
Shuh shuh lah ban kdew ba ha ki bnai ba la dep, na ka liang jong ka Sorkar Jylla ka la bthah ïa ka tnat pulit ban tohkit halor ka jingkynnoh bamsap ha ka projek shna surok kaba la kot da ki hajar klur. Haduh khyndai ngut ki briew, kynthup ki karikor ka tnat PWD bad ki briew na ki ar tylli ki kompeni shimet kiba na Telangana bad Haryana, ki la paw ha ka ejahar ba la ujor. Ïa kane ka kam la ujor da u Chief Engineer (National Highway) PWD (Roads) ha ka 10 tarik Nailur mynta u snem ha thanat Sadar hadien ba la bthah da ka Sorkar Jylla.
Hynrei na ka liang jong ki pulit kim shym la lah ban ïaid shakhmat na ka ‘preliminary enquiry’ naba kane ka mukotduma ka long ‘technical’, ha kaba kam shym la don ruh kano-kano ka jingkem ne ka jingkhot hajir ïano-ïano ruh. Dei tang ka byrta kaba la phah sha ka tnat Public Works Department na ka bynta ban lum ïa ki kot ki sla ba ïadei bad kane ka kam.
Kane ka projek surok Shillong-Nongstoiñ-Rongjeng-Tura ka dei kaba la ïoh jingmynjur ha u snem 2010 kum shi bynta jong ka Special Road Development Programme-North East ka Sorkar Kmie.
Ka dor jong kane ka projek ha kaba sdang la mang T.1,303.83 klur hynrei hadien katto-katne ki jingpynbeit thymmai, la kyntiew sha ka T.2,366.77 klur.
