Shillong, Naiwieng 10
Ki khynnah jong ka shnong Umsaw Mawjynrong ha ka Sngi Saitjaiñ ki la ïoh ban lehkmen ïa ka ‘Advance Children Days’ ryngkat bad u Bah PT Sawkmie, MLA barim.
U Bah Sawkmie kum u kongsan haba ai jingkren u la kitbok ïa ki khynnah na ka bynta kane ka sngi kaba kmen jong ki, ïa kaba u la ïaroh ïa ki sap shad bad rwai ba ki khynnah kane ka shnong ki don.
Katba u Rangbah Shnong ka Umsaw Mawjynrong, Bah Rapborlang Mawthoh u la pynpaw ba ka jingdon ryngkat u Bah PT Sawkmie ha ka sngi rakhe lypa ïa ka sngi ki khynnah ka la pynlong ïa ki ba kin sngew ba u dang dei u MLA bad u MDC jong ki.
U Rangbah Shnong u la pynpaw ruh ïa ka jingsngew shngaiñ kaba khraw da ka jingdon ryngkat u Bah PT Sawkmie bad u la ai khublei ïa u, kumjuh ïa ka National Rural Livelihood Mission (NRLM), ïa ki kmie ki kpa kiba la ïa don ryngkat ha kane ka sngi rakhe ïa ki khynnah.
U la kyntu ïa ki hep barit ban kiar ïa u drok uba pynsniew ïa ka jingim jong ki, kumjuh u duma uba ktah ïa ka koit ka khiah jong ki.
Ïa kane ka jingrakhe lypa ïa ka sngi ki khynnah kaba ju rakhe ha ka 14 tarik u Naiwieng ba la pynïaid da ka Iaitreilang Village Organisation, Aganwadi bad ka Village Health Council (VHC) jong ka shnong Umsaw Mawjynrong la pynlong ha madan shnong.
La pynphuh-pynphieng shuh shuh ïa kane ka jingrakhe da ki jingrwai bad jingshad jong ki heprit kiba la pyni ïa la ki jong ki sap ki phong ba ki don.
La ïoh ruh ïa ka jingkren na ka President jong ka Iaitreilang VO, ka Kong M Nongkynrih bad na ka Kong D Kharjana kiba la pynpaw ïa ka jingsngewnguh ïa u Bah Sawkmie halor ka jingnoh synñiang jong u kaba la lah ban pynurlong ïa kane ka jingrakhe.
