Shillong, Naiwieng 10
Ban khring shuh shuh ïa ki nongjngoh kai pyrthei sha kane ka Jylla lem ruh ïa kiwei ki briew ban wan shong pyngngad bad pynjahthait ïalade, la mih sa ka Dr. APJ Abdul Kalam Memorial Eco Park ha Pynursla.
Kane ka Eco Park kaba don hajan ka Dr. APJ Abdul Kalam Memorial Herbal Garden ha syndah ka shnong Siatbakon jong ka Raid Shabong Khyrim Syiemship ha ka jaka ba la ai sngewbha da ki khun trai Sawkur, Khapumsong bad Phlang u diak – Siatbakon, Pdeng Raid, kiba hap hapoh jong ka Khun Kur Longtrai Lai Kynthei jong ka Raid Shabong kaba hap hapoh ka Pynursla Sub Division ka long ka Eco Park kaba itynnad bha bad kaba don ïa ki jaka shongkai pyngngad ba la shna hapdeng jong ki khlaw bad ka wah ba tuid katkum ka jingpynwan dur bad ka mariang.
Kane ka Dr. APJ Abdul Kalam Memorial Eco Park kaba don ïa ka jingheh kumba 5 akar, ka don ha ka wah Diengrot ha kaba la buh ruh ïa ki lieng khnang ba ki nongwan kai kin ïoh ban shongkai sngewbha. Kane ka Eco Park ka don ruh ïa ki jaka lehkai jong ki khyllung-khynnah bad ka jaka bam ne Restaurant.
Shuh shuh ki nongpynïaid jong kane ka Eco Park ki la buh ruh ïa ki jaka sah ne ‘home stay’ na ka bynta kito ki briew kiba kwah ban sah sngewbha bad ki la pynbiang ruh ïa ka jaka ïeng kali bad ka jaka leit bar kaba paka bad shngaiñ.
Lah ban kdew ba ka jingtei ïa kane ka park ka long kum ban pynsah kynmaw ïa u President barim jong ka Ri India, u Dr. APJ Abdul Kalam uba la noh synñiang shibun eh sha ka pule ka puthi bad ka saïan uba la khlad ruh ha Shillong ha u snem 2015.
